By ZoZo Sailo
Kolasib JAC on National Highway and Construction te huaihawtin hlawhtling taka kawngzawhna hun leh NHIDCL laka kan thil phut/duhdan ang te tihhlawhtlin a nih avangin a lawmawm ka ti hle a ni.
Chutih rual chuan thil lungchhiatthlak tak tak sawi duh ka nei tlat. Kawng kan han zawh a, reilote chhung sawrkar force te nen innawrna kan han nei ve a, hun rei pawh a ni lo, a chhan chu College veng VC leh YMA te nen committee hona te lo nei tawh in, rem an tih chin kha NHIDCL office peng thuam lai tak kha a ni. Tichuan, reilote kan innawr hnuah pengthuam chu thlen phalsak kan ni a, kan JAC hruaitute leh NHIDCL te leh sawrkar lam official te leh khawtlang VC te NHIDCL office ah kan thil ngiat (Agreement) te sawi ho turin thutkhawmna an nei a. Hlawhtling takin JAC thil ngiat te pawh min pawmsak a, JAC hruaitute, NHIDCL lam hotute leh VC te pawhin an sign hnan vek a ni.
Tichuan, hun hlawhtling tak leh boruak ralmuang tak hnuaia hun kan hman zawh hnuah media lamah chuan party worker nge party lama mi ruhkawl hoin an lo politicized (politics game). A tenawm tak zet a ni. Thu chiang hriat lova hetianga thu vawrh darh ching te hi zak ngawih ngawih tur an ni. Committee na a ka tel ve thin avangin JAC te hian politics hawi zawngin eng kawngah mah hma an la lo tih hi kan hriat atan a tha. Kan JAC te hi pawisa nei miah lova hma la an ni tih te pawh hi lo hre ve ila, meeting a tui leina takngial pawh neiloa hma la an ni. Tin, he hma lakna hi a thianghlim a, a dik a chuvang chuan kohhran upa leh kohhran rawngbawltute pawhin telna tlak ah kan ngaih avangin kan tel ve a ni. Hei vang te pawh hi aniang e kan programme te pawh ralmuang tak leh hlawhtling taka kan zawh theih ni. Politics rawng kai zawnga rawn hmehbel hram tum kha thil tih awmloh tak a ni a. A thehdarh tu hi Kolasib mi leh sa kan nih chuan Kolasib khua hi in hmangaih loh hle ah ka ngai a, he khaw mi leh sa angah pawh in chhiar tlak in nilo tihna a ni. Khawtlang leh ram tana mi tupawhin hma a la anih chuan thlawp kha khua leh tui tha nihna a ni mai. Kolasib ah hian kum 14 chauh ka la awm, mahse khawiah pawh awm ila kan awmna hmunah khaw mipui ten min mamawh a nih chuan ka tlan chhe lovang, heihi khua leh tui tha nihna a niin ka hria, kan tih theih erawh a tam lo mahna.
Tin, kawng tha duhin kawng kan zawh a, thenkhat kawng sir kotlang atanga hmuhnawm thlira min lo thlir tawp te khan kawng tha hi in duh ve tho chuan ka ring si a, kawng hi in hmang tangkai ve tho chuan ka ring bawk. Khati taka hmuhnawm thlira min lo thlir kha mi pangngai tan chuan zahna tham a tling ka ti. A ngai pawimawh te chuan dawr an khar a, an inhlawhna an rawn tlansan a, an motor khalh sumo, truck etc an ding hmak asin! Kolasib hian tanrual kawngah hma kan sawn a ngai tlat. Media ah chuan,'Kawng tha duh pungkawm te chu an va tlem ve, Kolasib mipui hi an lo tam vaklo aniang e a' tiin post te an siam asin, a zahthlak lutuk. Tin, nimin lamah College vengah kan chhuk thla a, college naupang ten min lo thlir thup mai. Thalai te hian vei tur dik kan vei a ngai a, chu vei tur dik kan vei hnuah chauh chuan lehkha thiam i nihna kha a lang chauh ang. MZP te an ding ve lo nge aw ka ti rum rum mai, nimin lama kawng zawhna kha MZP involve na tur awm tak a ni, politics tuinu tel miah lo khatiang ram hmangaihna kawng zawh programme ah khan tel ve nachang hriat a tha.
A tawp berah chuan kawng kan zawh kha thenkhatin tharum thawhna leh sawrkar hna kal lai ti thuanawp zawnga hma lak tum ni anga thehdarh an lo awm emawni a zialo hle mai. Kolasib hian hmasawnna tur hrang hrang kan nei a, chutiang hmasawnna hmu tur chuan harsatna kan paltlang a khaw mipui te kut in suih kawm dan kan zir a ngai. District hnufual bik tia hriat kan hlawh reng hi a zahthlak, chumi ti hmasawn tur chuan a khaw mipui te kan pawimawh. Sawrkar officer te hi chu khaw mi an nih loh avangin min rawn hmangaih pui tak tak thei dawn lo, an duty an rawn ti anga, reilote ah transfer an ni leh mai dawn. Kolasib hmasawnna tur hian I tang rual teh ang u.