Ruatfela Nu
Ni 02 February 2026
THIAM ACHUNGAH MAWH A AWM: “Thiam achungah mawh a awm” tih, Mizo upa tawngkam kan tih hi “Upate tawngkam thu ro chhiah” tih a ni bawk. Kan thlahtute khan tangka leh ro sum dang min hnutchhiat tur nei lo mahsela; mihring nun ho kawnga hman tur thu tha leh hlu tak tak min hnutchhiah teuh mai. “A vawtuin ek a cheh’ tih pawh hi Mizo upa tawngkam a ni. Thiam achungah mawh a awm tih nen a inzul khawp mai. Tanhril tual thahna rapthlak tak thleng leh a kaihnawih rapthlak tak tho thleng mekah hian, Mizo upa tawngkam ril leh thuk tak, ‘Thiam achungah mawh a awm” tih angin, thihna tuartu (victim) chhungkua leh an sangawi zawnpui te’n an phur let mek a. Tuartu, mi khawngaih leh lainat hlawh reng tur chhungkua, thenrual tha leh khawtlang kha “over mah mah” tia dem kai a nih zawk ta hi a pawi ka ti.
ZANG NA DAWMNA NGIAT HRANPA A NGAI LO: “Mipui pung khawm aia a an awm lo” tih a nih angin rawng taka thah/tih hlum tuartu thlavang kan hauhna lamah kan dai sual bawrh bawrh a, tawngkam kan chhep sual rem rum fo hi kan fin loh vang a ni. Mi sual kut tuara thi te, pawng sual tawk te, mi sual pung khawmin an an bungraw che thei leh thei lo an tih chhiasakte tan (Tanhril khuaa tual thata puhte in mipui pungkhawmin an hal sak leh an scooty an tih chhiatsakte pawh khan an claim thei tihna. FIR an theh luh chuan) zang na dawmna ruahman sak a ni a, mahni awmna district, District Legal Services Authority (DLSA) ah mahni chan pual hauh (claim) theih a ni. Dilna chu Committee in a thli fim ang a. Pek awm an nih leh nih loh leh pek tur zat an bi thliah ang.
KAN NORTH KOREA TAWH EM NI?: Mizo khawtlang nun hi a huhoa mi suala puhte chunga tharum thawh hreh lo leh, khap hmanga khawtlang nun siam that theih emaw ti kan ni chiang bang. Kan khawtlang nuna tharum thawh kan hreh lo sawi nan, Islam sakhaw zuitute leh Communism thu rin pawmtute anga sualna lang thei khap hneh theih emaw kan intih sawi fiah nan : Mizo khawtlang nun chu Khapistan leh Talibanisation tia fiamthu nan kan hmang thin kha a ni a. Tunah chuan mi suala puh chhungkaw chungah nen lama tharum thawh kan chin avangin “a North Korea/a Kim Jongun” kan inti leh mek a ni. North Korea ram inenkawl dan kan hria a, chhungkaw zinga pakhat chauh pawhin communist sawkar duh loh zawng an tih emaw, Kristiana an inleh emaw chuan an chhungte chungah pawh an tuan tel zel a, manin labour camp-a an thawn loh chuan an that vek thin a ni. Mizoram chu Kristian kan ni a, North Korea ram ang maia chet hi a dik lo. Islam sakhuaah chuan Kristiana inleh chu thihna khawp sual a ni a, an ti hlum thin. Mi suala puh chhungte, pawi sawi ve lo hnawh chhuahte hi a Kim Jongun tak zet a, ching tawh lo ila a duhawm hle a ni.
KAN KUTA THU NEIHNA KAN INPEK THIN CHHAN: Mizo Dan lam thiamte min hrilh fo chu, India ram Danpui hi Bible behchhana duan a nih vanga ropui an tih thu hi a ni. Ni e, India Dan hi a nemin zah ngaihnain a khat a. Bible anga Evidence-a innghat a nih vangin America ram leh mi sual ti hlum thin ram dangte angin mi sual lo hrem palh hi a vang khawp ang. “Mi fel pakhat hrem palh ai chuan mi sual 99 chu lo zalen mai mai rawh se” tih hi a thu bul (principle) a ni a. Dan lam thiam mite’n an chhuang ngawt asin! Hei hi Lal Isua tehkhin thu, buh lem leh buh tak to za, a hote’n pawha paih an dil khan, Lal Isua chuan “buh seng thlengin to za mai mai rawh se, chuti lo chu buh tak in pawt tel hlauh dah ang e” a tih hi BR Ambedkar-a ten an hre fuh ve hle a nih ngei ka ring. Mizo tam zawk hi chuan mi sual, a sual ngei a ni tih la finfiah loh pawh vuak hlum kan duh a. Kim Jongun-a ang maiin an chhungte thlenga tawrhtir kan pawi ti lo a nih mek hi! Hei hi eng nge a chhan? Uire deng hlum tlak kan intih vang em ni?
A THLING BAW HAWKIN: Tanhril thil thlengah (mitthi pahnihte thlarau ka zah avangin an hming ka sawi lo a, an thlalak pawh ka forward hek lo) Tanhril khawtlang mipui thenkhat leh veng pawn lam atanga puitu chet dan kha a dik lo. An che rawva hret. Nula thattua puh, mahni inti hlum ta chhungte an tawrhtir kha a rapthlak mah mah a. A chhungte an ringhlel ve a nih pawhin police chhui turin nawr mai rawh se. Rin thu veka tihah chuan a uchuak lam a ni. Finfiah pawh ni se, Kristiante tih tur a ni lo, Isua hnawltu, hnawl chauh pawh ni lo, a huata hawtu Islam sakhaw betute leh Kim Jongun-a tih awm tawk a ni. Nula thattua puh chhungte kha an inhnamhnawih hlek lo a nih chuan an tuar nawntir kha tuam dam a har khawp ang. Zahna leh mualphona bakah lu an sun ve bawk. Lu pawh an sun thei loa siam an ni.
MITTHI TE I CHAWLHTIR TAWH ANG U: Ngaihtuah tawi taka chetlak pawizia chu- Mi sual kut tuara thi hmeichhia nau pai kha eng anga fel lo pawh ni se thih a phu lo. Hahdam leh lungmuang, zahawm leh thlamuang taka chawlh erawh a phu a. Chin tawk awm lo leka a thlavang an hauhna lamah a chhungte leh tuartu ngei diriam leh cheksawlh a hlawh phah mek a. Ka sawi thui tawh lo ang e. Mitthi pahnih thlalak leh an hming pawh social media lamah tar lang tawh lo ila, Mizo mipui, a bikin youtuber te pawh insum tawh se, thlamuang takin i chawlhtir tawh ang u.