by Jason-a Pa, Hermon Veng, New Diakkawn
Tunlaiin thal kan hmang chho mek a, thalvaekchara Kolasib mipui tam zawk kan buaina chu tui harsa thin hi a ni fo mai. Tui sem tur thal laiin a tlem thin bakah kan tui lakna khawl chhiain engemaw tawk chu a nghawng dawn tih a hriat a. Hei vang hian mipuite pawhin hriatthiamna nena tuisem kan nghah thiam a ngai ang.
Mizo pipute hun laia sem sem dam dam tih kha chu a theih tawh loh chiang a. A tuizem nei tha tha, a ti thei thei duhamna ramah kan cheng tawh a. Thenawm ten nei lo mahse mahni kan kham chuan tia lungmuang taka awm thei mihring awmkhawmna Kristian ram kan ni tawh a. Hei vang hian tuisemna kawngah mipui kan lungrual thei tawh lo a ni. Tuisemtute pawh hi sem sem dam dam tia sem thei mi tha kan nih zel pawh a ngai hle mai.
Hetiang anih vang hian kan tui lakna ber Tuichhuahen lui hi kan duat a ngai. A kam sirah ngaw kan siam belh a, a ngaw awmsa a la awm nih phei chuan duat taka kan humhalh that a ngai a ni. Heng bakah he lui zawmtu kan luikawrte kan enkawl nasat zual a ngai a, heng luite tihfai leh enkawl thianghlim pawh Kolasib mipui ten kan ngaimawh thar a tha hle ang. Kolasib ah mihring kan pung zel a, tuna kan tuilak hi chuan min chawm theih loh hun a thleng thuai dawn tih a chiang hle a. Hei vang hian tuilakna dang tun atangin kan ngaihtuah pawh a ngai hle dawn a ni. Kan tuilak kawngah leh a thianghlim kawngah rilru kan sen thar a ngai hle a ni.
Kan pi leh pu te tawngkam kha mi pawisawi an hlauh lutuk avangin, mite tan ngaihthlak hrehawm thil an sawi ang tih an hlauh avang leh mi an zah vang a ni. Engnge in buh leh bal a an? tiin an han in zawt a. Kumin chu in thar tha dawn em? tia an han in zawh hian, hawp khawp chang chang te chu kan thar ve mahna. A chang phei chuan zuvain zah ngai sela, hawp khawp chang chang kan thar ve mahna an tih chuan ei khawp kan thar dawn e. A tha dawnin kan in beisei ve an tihna a ni. "Kan thar tha dawn kan lawm lutuk e, kan vannei lutuk," an tihduhlohna chhan chu an bul velah emaw; an piah deuhah emaw damlohna vanga hlo thlo tha thei lo emaw, zuva vanga thar hnem theilo te an lo awm palh ang a. Chumi/khamite tan ngaihthlak a hrehawm palh ang, vanduai bik riauna te an nei palh ang tih an hlauh vang a ni.
Vanapa te khan tuna motor tha ber ber rawn khalh ta se,zanlaiah te hian thawm dim deuhin an rawn tlan ka ring a ni. Mi tiraltitu, mi ti hrehawmtu nih kha a hlauhin an hlau tlat a ni. Hmanlai kan pi leh pu te kha tunlai zingah lo awm ve ta se, an duh duhnaah in (house) an sak ka ring lo. Hetah in kan sak chuan kan thenawm te tan a hnawk palh ang, puan an pho thei lo palh ang tih kha an ngaihtuah ka ring tlat a ni. Heta kan sak chuan kan thli paihna heti zawng hian an tan a ninawm dawn tlat tih te an ngaihtuah ka ring tlat a ni. "Helai hi kan ram a nia," tih pawh nise, duh duha an rawn laih bawrh bawrh ka ring chuang lo. Thil tha tiha mi tanpui an nih pawhin puanzar an duh ka ring lo, a chhan chu an zak ang an tih ka ring a ni.
Tunlai kan tawngkam hi chu, "miten hrehawm an ti ang em?" tihte ngaihtuah miah lovin aia hniam zawk te kan hnehsawh em em a. Aia upate zahna a awm ta lo emaw ni le aw tih ngaihtuah tawh ngai lova, tawngkam hman dan kan in zirtir a ngai tak meuh meuh tawh a ni. Keimahni ram ngeiah in leh lo sa ila, mite ngaihtuah miah lovin in te kan han sa a. Kawng a dal em? mi in sak kan dip em? mi ram kan pel em? tih te kan ngaihtuah ngai tawh lova. Kan in sak duh dan leh kan ram neih danah hian mi ram nek ranin kan awm a. Heti hian ka ngaihtuah thin. Mi ram va nek ai chuan thenawm ten hnawksak min ti ang em? In kan sak hian thenawm te nek rana in sak ai chuan emaw, kawng dala in sak ai chuan inremna awm zawnga in sak hi tiin ngaihtuahna hman a va tha em!!
Traffic jam chungchangah pawh han ngaihtuah ila. Motor kha kawng lai deuhah ding se, traffic jam ta vak se. Heta exam beitu tur kha tlai se, a mark hmuh tur ang a hmu dawn lo. Damlo na deuh lo awm bawk se, engnge a dinhmun tuma'n an hre lo. Engvanga jam nge? Mi pakhat vang kha a ni. Chuvang chuan kan motor din dan te leh tlan dan thlengin kan inzirtir a ngai a ni. Midang tana hnawksaka motor khalh emaw, ring tak tak tlante hi mihring nun a tibuai ang tih te hlauh tur a ni. Mite ngaihtuah miah lova khek tuarh tuarh te hi thil tha ber a ni lo tih hriat tur a ni.
Miin vanduaina tawk ta se, social media-ah an post chiam a. An zak ang em? hrehawm an ti ang em? tih ai chuan larkhel/pawisa hmuhna tur tih chiah an ngaihtuah a. Heti lo hian tanpui kan duh chuan beisei nei lovin tanpui ila. Midang tan malsawmna leh an lawmna a ni ngei ang.
A tawp ber atan chuan kan pi leh pu te dan tha hi kan zawm tur a ni. Keini nu leh pa te, kan pi leh pu te atangin kan la ang a, kan tu leh faah kan hlanchhawng zel ang. Chu chu Mizo kan nih phawt chuan kan mawhphurhna a ni.