TURNIPUI Dt. 05.02.2026 : Sorkar laipui hnuaia Directorate of Census Operations hotute chuan kumin April thla atanga September thla chhungin chhiarpui thawh khatna, ram pumah neih a ni dawn, an ti.
Census Operations hotuten Akashvani News Aizawl an hrilh danin, kumin April thla leh September thla inkar a chhiarpui thawh khatna neih tur hi, a hmingah house listing operation tih vuah a ni a, hemi hnuaiah hian chhungkaw member zat leh chhungkaw lu berte chhinchhiah a ni ang. Census Operations hotute chuan, Mizoram a census thawh khatna tih hun tur ni chu sorkar laipuiin a la hriattir rih loh thu an sawi a, hriattir an nih ve leh Mizoram sorkar hnuaia census kaihnawih State Nodal Agency nen chet lak dan tur an rel tur thu an sawi bawk.
Census Operation hotute sawi danin chhiarpui thawh hnihna “Population Enumeration” chu nakum 2027 February ni 9 atanga ni 28 February chhunga neih zawh hman vek tum a ni bawk.
”India ramah hian chhiarpui hi kum 1881 atang khan fumfe takin kum 10 danah neih chhoh tan a ni a, kum 2021 kha dan pangngaiah chuan chhiarpui tum 16-na neih hun tur a bituk kum nimahsela, Covid-19 hri leng avangin neih theih a ni ta lova, 2021 atanga chhiar a kum nga hnu, 2026 atangin chhiarpui tum 16 na nei tur hian nikum 2025 June ni 16-a Ministry of Home Affairs thuchhuak angin inpuahchahna kalpui chhoh tan a ni.
Chhiarpui tum 16-na neih turah hian hun dang ang lo takin mobile application hmangin chhiarpui thawh khatna, house listing operation neih a nih hma ni 15-ah chhung tinten Self enumeration tih tur a ni a, hei hi sorkar laipui atanga thuchhuak a awm ve leh Mizoramah pawh tih tan nghal tur a ni a, a tihdan tur pawh sorkarin a rawn tichhuak mai tura rin a ni.
