Inrinni kalta (ni 10.1.2026) khan Kolasib Sub-Hqrs YMA Office-ah Central YMA team, Sub-Hqrs OB te leh NHIDCL contractor ten meeting an neih tuma an rel angin, NHIDCL contractor ten nimin (ni 13.1.2026) atanga an Hot Mix Plan khawl tinung (run) tur leh hna pawh thawk nghal tura an intiamna chu Kolasib Sub-Hqrs. YMA executive committee member te chuan an inbunna hmun Phaiphengah an zuk endik a. Kawng siam hnathawktu Jandhu te hi lo inhnukdawkin, an hnathawh ai thawk turin Parmardas Sub Contract-in an lo pe tih an lo hrilh a ni.
Jandhu Sub-contractor Parmardas te hian an Hot Mix Plan khawl thar hi an lo install tawh a. Hetihlai hian khawl tinungtu tur diesel generator chu Delhi atangin a lo la thleng lova, a lo thlen hunah enchhinna (trail) neiin, a that chuan hna an tan thei chauh dawn a ni. Diesel generator a lo thlen hma chuan black topping hna hi an tan thei dawn lo tih an sawi.
Kolasib Sub-Hqrs YMA hruaitute chuan kawng siamna atana an mamawh hmanrua hrang hrang te lo inpeih fel vek a, khawl thar lo thlen veleh hnathawk tan nghal thei tura lo inruahman turin contractor te hi an hrilh a ni.
