TURNIPUI Dt.26.01.2026: Mizoram chhunga India Republic Day vawi 77-na lawmna pui ber Aizawl Sipai Lammual atangin tukin khan Mizoram Journalists' Association member mi engemaw zatte chu kumdang anga an thutna tur PRESS enclosure siamsak an nih loh avangin an haw a, Republic Day lawmna programme ah an tel lo.
MJA OB pakhat hnen atanga TURNIPUI palaiin thu a dawn danin, kumin Republic Day lawmna Aizawl Sipai Lammuala neih turah hian MJA member te chuan sawmna card a blank, hming fill up chawp ngaiin Aizawl Press Club-ah an dawng a, VIP at Home sawmna erawh kumdanga tih loh danin MJA office bearers te chauh pek an ni thung a. A hma chuan sawm bik awm lovin accredited journalists zawng zawng sawm thin an ni a. VIP at Home sawmna pawh hi a blank tho-in an dawng bawk a. MJA member tam tak chuan hrethiam lo mahse, hotuten an khap dai hram hram a; amaherawhchu Republic Day lawmna Sipai Lammualah ber PRESS mite thutna tur 'enclosure' siamsak an nih tak loh avangin an haw ta a ni, a ti.
Hetianga thil a thlen tak avang hian MJA chuan Emergency meeting vawiin chawhma dar 11:00 AM hian Aizawl Press Club ah ko nghal a, Press mite thutna tur enclosure siam loh leh VIP at Home-a sawm bik neih hi a thlen vawikhatna niin sawi a ni bawk.
