TURNIPUI Dt. 18.02.2026  : Vawiin chawhma khan Congress Thalai Hqrs. – Mizoram Pradesh Youth Congress Committee (MPYCC) te chuan Mizoram Chief Minister Pu Lalduhoma In sak mek Chawlhhmun veng ami chu an tlawh a, Mizoram Chief Minister lo ni tawhte hausakna a khum thuai dawn niin an sawi.


MIZORAM PRADESH YOUTH CONGRESS COMMITTEE

No. MPYCC/Mz-B/2025-2026/86   Dated: Aizawl the 18th February, 2026

 

PRESS RELEASE


Vawiin ni 18.2.2026 (Nilaini) hian Congress Thalai chuan Chawlhhmuna Chief Minister Pu Lalduhoma insak a hmunah tlawhin zir chian a ni a. Chief Minister la ni rei lo ber Pu Lalduhoma hian Mizoram Chief Minister lo ni tawh zawng zawng hausakna a khum thuai dawn niin MPYCC chuan a ngai.

             

Kum 2021-a Serchhip By Election-ah khan tuna kan Chief Minister Pu Lalduhoma hian, kei hi pawisa engmah ka nei lo. Bye-election hi ka tan a huphurhawm lutuk, General Election-a ka leiba pawh ka la rul zo lo, tiin dinhmun tha lo leh rethei, khawngaih thlak takin a in sawi a. Khatiang khawpa pawisa nei loa insawi khan Chief Minister atana lakluh Swearing-in a nih hma hauhin a chenna tur Babel in sang sakna turin tlang a rawt nghal a, thla khat chhung teh meuh zing 9:00 atanga zan dar 10:00 chhunga in hmun chhum lo chat lovin a lai zui leh nghal zat thei leh si hian Mizoram mipui mak tih leh rinhlelh a hlawh nasa hle a. Lengpui ram hralh chungchanga a hralhna man an thlakhlelh thu a sawi leh ZPM sorkar hlima ram hralh tur hmanhmawh phelenga file an kal tir khan Chief Minister in sak hi a in zawm ngeiah mipuiin an ngai a ni.

             

He Building Drawing hi Hrangthanga Zote (R. No A/AMC/2011/13) niin, a neitu hi Ruata s/o Lalduhoma a ni. Building hi Ground Floor tel lovin Mizo chhiara chhawng 6 tura duan a ni a. Ground floor hi 66 m2, 1st Floor 150 m2, 2nd 226 m2, 3rd Floor 352 m2, 4th floor 443 m2, 5th floor 504 m2 leh 6th Floor 504 m2 niin building pumpui zau zawng (area) hi 2245 sq.m teh meuh a tling a ni.  

             

Serchhip By Election-a khatiang taka insawi rethei si khan Pu Lalduhoma hian Zonet Zoram Kalsiam in an kawmnaah, Chief Minister P.A ah kum 6, IPS, MP, MLA ah vawi nga (5) a tlin tawh thu leh a Background thlirin mahni in chu sa ve hle thei tur niin a insawi lian leh hle si hi hausak thutna a awm ngeiah Congress thalai chuan angai a ni.

 Pu Lalduhoma hian tuna a in sak mek hi SBI hnuaia UNNATI Scheme hnuaiah nikum 2025-ah loan an lak thu a sawi a. Mahse hei hi mipuia in phatmarna leh mipui rilru bumna mai a ni. UNNATI hnuaiah Hotel, Home Stay, Restaurant, Hospital, Industry din nan te industry tihlenna atan te (plant and machinery atan bik) a loan la ten an loan lak zatve an claim let leh theihna scheme a ni a. Mi pakhatin Crore 250 thleng an la theiin UNNATI hnuaia subsidise dil hi mi 16 awm tawhin mi 3 approved tawh zingah Pu Lalduhoma fapa hming a tel loiin dilna 4 hnawl a ni a, dilna lut thar a awm bawk. Pu Lalduhoma’n Bank in an lo pe anga a sawi hi thil dik lo let tawp a ni. Heng an din dawn a nih pawhin endik thlap niin sak zawh hnuah pawisa hi pek chhuah chauh a  ni thin. Pu Lalduhoma’n awlsam tak anga sawia thalaite pawh ti ve tura a sawi hmuh hi thil ngaihthlak nuam tak niin lang nimahse mi bik tan lo chuan tih ve mai mai theih a ni lo, hei pawh hi thiam chan tuma insawi mamna maiah Congress thalai chuan a ngai a ni.  

 

Chief Minister Babel in sang sak mek leh Lengpui ram dik lo taka inlei hun a in nang chiah te, Council of Ministers meeting in CBI chhui tura FIR an thehluh an tum thulh a nih leh dan te hian thil dik lo a awm zia an pawmah Congress Thalai chuan a ngai a. ZPM Chief Minister Pu Lalduhoma hian an sorkar hma khan portfolio a neih ve dawn loh thu a sawi a, mahse Chief Minister a nih rualin portfolio tha tha a chang a. Kalphung thar chu mipui sum mahni tana inhaivurna a ni tih a ti chiang a. Tunhnaia hetianga a hausa thar ta thut hi a mak lova, pawi khawihnaah Congress Thalai chuan a ngai a ni. 

            

                  Sd/-

(C. LALHMACHHUANA)

             Secretary,

i/c Information & Publicity

Mizoram Pradesh Youth Congress Committee