TURNIPUI Dt. 11.02.2026 :
Kolasib-a tlawmngai pawl hrang hrang intelkhawm - Joint Action Committee (JAC)
chuan Kolasib District leh khawpui chhung kawngpui hunrei tak ngaihthah anih
avanga an lungawilohna lantir nan Kolasib College Veng-a NHIDCL office chu February ni 16 khian an
hual dawn a, he huna tel tur hian Kolasib mipui a tam thei ang ber an sawm
bakah, NHIDCL office hi tala-a kalhsak nghal an tum.
Joint Action Committee (JAC)
chuan thuchhuah siamin an hmalakna tur hi vawiin khan an puang a, Dt.5th
Febuary 2026 zana JAC thurel chuan Kolasib District leh khawpui chhung kawngpui
chu ngaihthah anihna a rei tawh em avang leh Pawl hrang hrang leh Sawrkar lam
atang pawha nawrna vawi tam tak a awm tawh chunga hmalakna a la thut reng
avangin a siamtu tur NHIDCL te chuan Mizoram mipuite min zah lovin min tham lo
hle a ni. Kum 2 chuang furpui kan tuar tawh chunga, tun thlenga hmasawnna a bei
thamzia leh kawng siamtu NHIDCL leh an Contractor ten chhuanlam an la neih
nitin avangin, kumin 2026 fur lo thlen hma hian eng dinhmunah mah min thlenpui
leh dawn chuanglo nia a lan chian em avangin JAC chuan Dt.16th Febuary 2026
(Dar 11:00am) hian NHIDCL Office ‘Hual’ hnatlang neih chu a rel ta a. Hemi Ni
hian Kolasib mipui a tam thei ang ber min tawiawm turin kan sawm nghal a ni, an
ti.
An thuchhuahah chuan JAC te
hian, NHIDCL Office Hual hnatlangah hian Banner siamin NHIDCL chu Mizoram kawng
siam tura an fit tawk lohzia te tarlan nise. An General Manager BK Srivasthava
leh Project Manager Saksham Tyagi te chuan Kolasib bakah Mizoram chhuahsan tura
tarlana au khum nise. Heti taka Mizoram mipuite min zahlo leh Kolasib mipuite
min thamlo em em tu te hian, kha leh chen hna thawhna hun an neih tawhah khan
vawiin ni thlenga hmasawna hmel thar tha min hmuh tir tur an la neihloh avangin
an Office hi kalhsak nise. Hemi karah hian an hnuaia Contractor (J Infratech/
JANDHU , Balaji leh BR Goyal) te chu an hnathawh lai chawl lo tur leh a hmaa an
bill tih tan sak thin pawh ti tawhlo turin kan hriattir bawk a ni.
Mizoram Tipper Association
(Drivers & Owners) District Hqrs Kolasib te paw’n 2024 kum atang khan
Sawrkarah te zualkoin Kolasib District National Highway kawngpui hi siamthat
anih theih nan theihtawp an lo chhuah tawh thin a. Official ten dawhkan kilin
vawi duailo ro an lo rel tawh thin a. Mizoram Truck Drivers Association ten
Guwahati High Court-ah PIL thehluh pawh zah miah lova tun thlenga an la awm hi
na kan ti a, existing road enkawl zui a awmlo rigawt pawh hi hriatthiam har kan
tiin, Drivers tan a him tawh lo hle bawk. A siamtu tur ber NHIDCL te hian
vawiin ni thleng hian hmasawnna hmel tha zawk leh furah pawh tluang taka
lirthei tlanna tur min siamsak a hnekin thalah pawh kawngpui khu lutuk avanga
mipui hriselna hialin a tawrh mek hi na kan ti a. Hetiang reng anih chuan
engtikah mah kawng tha min siamsak tak tak duh lo tih hi a chiang hle a ni, an
ti.
Hma an lo lak tawhna sawiin,
Youth for Kolasib te hian October 2025 atang khan vawi engemaw zat NHIDCL te hi
dawrin meeting an lo neih pui tawh thin a. Kum 2025 Krismas hma ngeia Kolasib
Town (Rengtekawn to Thingdawl) chu Black Top zawh hman tura vawi engemaw zat an
lo intiam tawh pawh vawiin ni thleng hian tih hlawhtlin a la ni lova. Hetianga
Kolasib mipuite tham lo taka dawt muhluma min bum kual reng te hi na kan ti em
em tawh a. Heng zawng zawngte avang hian JAC chuan Kolasib leh Zoram mipuiten
kan tawrhna hi a na tawk tawh a, kan tawrh belh zel loh nan NHIDCL te hian BK
Srivasthava (General Manager) leh Saksham Tyagi (Project Manager) te hi a rang
thei ang bera Mizoram atanga transfer an nih theih nan hma a la nghal a. An
lakah hian Kolasib mipute kan lawm lohzia lantir nan NHIDCL Office Hual
hnatlang a koh a lo tul ta a ni, an ti.
Joint Action Committee hi
January ni 27, 2026 khan Diakkawn YMA Hall-ah din a ni a, Kolasib-a Commercial
Vehicle Pawl hrang hrangte leh MUP, MZP leh Y4K te an tel a, pawl tin aiawh
office Bearers-ah awmin an Chairman chu Malsawmtluanga (President Youth for
Kolasib) a ni.
