Nimin (24.3.2026) khan Kolasib Venglai Parish Hall-ah Chief Medical Officer (CMO) office buatsaihin World TB Day, 2026 cum TB Free Villages Ceremonial Function hman a ni a, thupui ah ‘Yes! We can End TB. Led by Bharat. Powered by Janbhagidari‘ tih a ni. He hun hi Kolasb Addl. DC Pu Lalmuan Puia (Incharge DC.Kolasib) chuan khuallian niin a hmanpui.
He hun kaihruaitu Kolasib Sr Chief Medical Officer Dr. RK Lalthlamuana chuan District huapa World TB Day 2026 hman a ni leh thei chu lawmawm a tih thu a sawi a, India ramin TB natna umbo tumin chak taka hma a lak thu te, he natna dona kawngah hmasawnna thui tak thleng tawh mah ila, umbo a nih theih nan sawrkar hmalakna mipuite’n kan thlawp that a tul thu sawiin, TB natna umbo a nih theih nan District Administration, NGO, Village Council-te leh Kohhran thlengin inzirtirna kalpui that a pawimawh thu a sawi a ni.
He hunah hian khuallian Pu Lalmuan Puia, Addl.Deputy Commissionner chuan thu sawin, World TB Day hmang tute chibai a buk a, District TB Centre ten TB chungchanga hma an lakna ah lawmthu a sawi a, TB hi natna hlauhawm tak a ni thin a, mahse tih dam theih a nih dan te sawi lang in, TB natna vei te zawn chhuah chungchangah khawtlang hruaitute chu hmalak pui ah a sawm nghal bawk. Khuallian hian TB Umbo beihpui thlak leh na tura hmalakna 2nd Phase Kolasib District chhung a kalpui tur a hawng nghal a ni.
Nimin World TB Day hmanna ah hian thusawi hrang hrang ngaihthlak a ni a. TB umbo chungchangah hian khawtlang hruaitute an pawimawh zia te, hna an thawh nasat zia te tarlangin, TB umbo 1st phase hi zawh tawh niin, 2nd Phase kalpui leh tum mek a ni a, 2nd Phase-ah hian Kolasib district chhunga khaw hrang hrang 14 a huam leh dawn a ni a. Heng khaw 14 atang hian uluk zawkin a tam thei ang ber TB Screening neih tum a ni.
Report a tarlan a nih dan in, kum kalta 2025 chhung khan Kolasib District chhungah TB vei mi 188 hmuh chhuah a ni a, TB vanga thi 8 awmin, TB vei dam hi 72.87% a ni.
Nimin programme ah han TB umbo chungchanga, TB natna vei te enkawl a, lo chhawmdawltute hnenah chawimawina Certificate hlan a ni a. Heng bakah hian TB natna vei awm lohna (TB Free Village) Kolasib District chhunga Village Council 27 te hnenah Medal leh Certicate hlanna neih nghal a ni.