MPCC President chuan College vengah voters 46 a lawmlut. Aizawl khawpuia College vengah Congress Local Council a piang
Vawiin March 20, 2026 hian Mizoram Pradesh Congress Committee chuan Political Session an nei a, he hunah hian Pu Lal Thanzara, President MPCC chuan party zawm thar ZPM leh MNF atangin mi 46 lawm takin Congress party ah a lawmlut a. "Congress inzawm hi intisualin ka ring lo" a ti.
Congress zawm thar lawmluh te hi College veng vek an ni a. ZPM 11 votes, MNF 34 votes leh neutral 1 vote niin an vaiin mi 46 an ni a. ZPM Unit hruaitu pawimawh leh MNF Unit hruaitute pawh an tel a ni.
Lal Thanzara chuan thu sawiin "ZPM kum hnih kan enchhin tawh a, beisei taka thlir tute an beidawng tawh hle a. Sawrkar kal ta te aia felfai leh serafim anga insawi an ni a.
Tun sawrkar in an tih hmasak ber chu Mizo mipui zawng zawng nghawng buhfai man a ti to a. Buhfai supply turin tender chhang hniam ber pawh ni lo LZ Juice an thlang a. An buhfai supply dan te Kan hotuten enzui zelin thil fello tam tak a awm tih hmuhchhuah a ni. Truck ke 16 neiin buhfai bag 700 lai te an phurh theih laiin LZ Juice te hian buhfai bag 16 chauh te an phurh tir a. Tin, Challan-a a lan danin buhfai phurh nan car te pawh an hmang a ni awm a, an car erawh a chak tha hle aniang, buhfai bag 700 zet an lo phurh tir niin a lang. Mak leh deuh chu JCB pawhin buhfai bag 720 phur angin chhinchhiah a ni bawk.
Mipui nghawng buhfai kaihhnawihah hian corruption awm thei thil te a nih avangin chumi vengtu tura ZPM in an neih Val Upa Council te pawh hrilh hriat an tha ngawtin ka ring" a ti.