Inrinni (4/4/2026) zing dar 10:30 khan Zoram Thar Zofâte Lairêlna Inpui chuan Zoram Harhna kum 120 na lawmna inkhawm an buatsaih a. Zing dar 10:30 ah Mizoram Bethel Lungphun, Chaltlangah hun an hmang. An hruaitu Rev. Dr. Zaichhâwna Hlawndovin a kai hruai. Mizoram Bethel Lungphun a nih dan Nunnathingparlawma'n a sawi a. Lalpan Zofate Thlarau Thianghlim hriak min thih avanga lawmthu sawina leh kan ramah Thlarau Thianghlim hnathawh ropui tak a lo thlen zel a, mei mit lova a mite a tlenfai zelna tura ṭawngṭairualna te an nei. Pi Zosanglianin a nu leh pa Pu Thangzika Ralte leh Pi Vanlalthawmi te chanchin leh Bethel Lungphunna tur ram an pek thute a sawi.
Chawhnu lamah Zoram Thar Zawlbûk, Zodin Square ah hun hman chhunzawm a ni a. Mafeli Hlawndovin a kaihruai a. Pathian faka zai leh lamna hun hlimawm tak an hmang a. Kum 1906 a Mairang Assembly chhim a, Zoram Harhna pawchhuaktu mi 10 te chanchin chhiar chhuahna neih a ni. Hemi rual hian an chhungte lo kal hnenah hriatrenga leh chawimawina hlan an ni. Pu Thangzika Chawngthu te nupain Bethel Lungphunna tur ram an pek hriatrengna leh chawimawina Pi Rohlupuiin Pi Zosangliani a hlan bawk. Zathiam Rinhlui Tlumangin Lalpan Zofate Thlarau Thianghlim min pek avanga lawmthu sawina leh chawimawina hla Harhna Ropui tih hla hmangin mipuite a awi.
Zoram Thar hruaitu Rev. Dr. Zaichhawna Hlawndo in a lehkhabu ziah Harhna Hmasa Ber Pawchhuaktute Chanchin tih chu a tlangzarh a. Sermon thupui "Kha Bethel Pathian kha ka ni" tih hmangin a sawi. Pu Zaichhawna chuan Mizoram Bethel lung phun hi Zofate chenna ram thar tura a lo ruatsa diam leh hnam anga min din thar lehna tur hmun a ni tih a entir a. Lalpan hnambote chanchinṭha hmangin min rawn zawng chhuak leh a, Thlarau Thianghlimin a leilung pawh hriak a rawh thihna hmun a ni a ti. Harhna pawchhuak tura kal mi 10 hian Israel hnam 10 Pathian thuthlung bawhchhetute ai an awh a. Chung hnam 10 te chu hun hnuhnungah a din thar leh dawn a ni a ti. He hun hmang tura sawmte pawh an kal ṭhain a hlawk thlak an ti hle.