TURNIPUI Dt. 22.01.2026 : Ranglong mipui kût - Ranglong Khohui Cultural Festival, Tripura North Panisagar khuaa neih chu nimin khan Mizoram atangin Adviser to Chief Minister pahnih - Lalmuanpuia Punte, MLA leh Dr. Lorrain Lalpekliana Chinzah, MLA ten an hmanpui a, Zohnahthlakte impumkhatna thuchah an sawi.
Pu Lalmuanpuia Punte chuan, "Ranglong emaw tute pawh nise Mizo vek kan ni a, kan tawng hmante pawh Mizo tawng vek a ni a. Duhlian tawng kan hman loh avangin Mizo ta lo bik riaua inngaihna hi a dik lova, kan za vaiin unau vek; Mizo vek kan ni a, Zohnahthlak tawng hrang hrang kan hmang mai zawk a ni," a ti a. Ranglong Khohui chu Zohnahthlak kūt ka chhim tawh zingah kût changkang ber ka tawng hi lawmawm ka ti tiin, Kut buatsaihtuten insengso lo zawnga ei leh in zawrhnate in ruahman hi a tha hle a ni, a ti bawk.
Thusawitu dang Dr. Lorrain Lalpekliana Chinzah chuan, "Tunhma lam chuan hnam hrang hrangte indo a, in run thin kan ni a; chung hunlai ngaituahin tun huna Zohnahthlak kan han leng ho dial dial thei hi a lawmawm hle. Ranglong unaute hian in hnam nun leh tradition vawng nung zel turin ka chah che u a, mahni hnam hriatna leh vawn nun zel nachang hriat hi thil pawimawh a ni," tiin; Ranglong Khuhoi-a khualthaa an sawm chu a lawm thu a sawi a ni.
Ranglong Khohui hi Dt.20.01.2026 khan hman tan niin, vawiin hian a tiak dawn a. Tripura sawrkar atangin Minister leh mi pawimawh dangte pawhin an hmanpui a. Hnam lam chi hrang hrang leh zaite ngaihthlak a nih bakah, an hruaituten thuchah pawimawh tak tak an sawi a. ZORO Gen Hqrs Aizawl aiawh bakah Tripura Group YMA aiawhte pawhin an hmanpui bawk a ni.
