Vawiin khan Buhchangphai Community Hall-ah Sawrkarin Buhchangphai khua JJM hnuai atanga tui hnianghnar a pek avanga lawmna ni leh WATSAN Committee kuta hlanna hun 'Jal Arpan Diwas' hman a ni a. Pu Robert C. Lalhmangaiha, Deputy Commissioner, Kolasib chuan Khuallian niin a hmanpui.
Pu Robert C. Lalhmangaiha chuan Sawrkarin Buhchangphai khaw tana tui hnianghnar pek an nih avanga a lawmpui thu a sawi a. Kolasib District a PHE department te nena an thawh hona leh an hmalakna hrang hrangah theihtawp an chhuah thu sawiin. Mipuite tana tui hnianghnar zawk an dawn theih nana vawi tamtak thuthona anlo neih tawh thu te tarlangin agreement signing leh hand over te pawh an neih phah avanga lawmawm a tih thu a sawi bawk.
Kalkhawm mipuite a bik takin zirlai te hnenah fuihna thu sawiin bawlhhlawh a hmun taka paih turin a fuih a,a paih dan tur an sawi te felfai taka zawm hram hram turin a chah bawk a, kan hma hun zela tui hnianghnar tak kan neih theih nana a pawimawh thu a tarlang bawk. Buhchangphai khawtlang te chungah lawmthu sawiin ramri dep a awm an nih avanga an hmalakna leh an dinhmun pawimawhna te a sawi lang in Assam nena inlaichinna siam tha tu nih tum zel turin a chah bawk a ni.
Vawiin hun hmanna hi Er. Lalrosangi, Sr.Executive Engineer, PHED, Kolasib WATSAN Division in a kaihruai a. He Solar Pumping Scheme hi Kolasib District-a hmang hmasa ber khua an nih angin tunah pawh Kolasib Sub-Division huam chhunga a lawmna neih na tura thlan an nih thu a sawi a, a lawmna hun hi sawrkar pawn hmang ngei se a duh thu tarlangin inhlanchhawn na Jal Arpan Diwas an hmang thei chu lawmawm a tih thu a sawi bawk.
Er. Cindy Vanlalnghaki,Sub-Divisional Officer, PHED, Kolasib WATSAN Sub-Division in Technical Report a pe a. Buhchangphai Solar Pumping Scheme hi May 2022 a thawh tan niin March 2024 a zawh a ni a. Tuilak lui atanga gravity-a lak niin tui tih thianghlimna sedimentation Tank leh filter a paltlang hnuah clear water sump atangin tui pump na khawl a tuizem a pump luh a ni a.He nizung chakna hmang tur hian Solar plate 112 hman niin tui pump na khawl hian nikhat ah tui Litre 145200 pump thei tura duan anih thu a sawilang bawk. Jal Jeeva Mission Scheme hnuaia thawh niin Estimate amount hi 212,93,000 a ni. Solar pumping scheme hi install atanga kum 15 chhunga tui hnianghnar tak pe thei tur a duan a ni a. Grid Pumping Scheme te thlakhat a energy bill cheng nuaih tam tak sen a ngaih laia nizung chakna hmanga tui hlawhtling taka pump a ni thei chu mipui te pawn dim thiam a ngai hlu thiam turin a ngen a.
Meripanchayat apps pawh Google playstore ah download theih a a awm thu sawiin hmang tangkai theuh turin a chah bawk a ni.
Pu Malsawmtluanga, District Co-Ordinator chuan tui lakna document pawimawh hrang hrang leh test report hrang hrangte khawtlâng hruaitute hnenah a hlan a. Village WATSAN Committee kutah intiamna leh tui lak enkawlna hna hlan nghal in mipuite thutiam tirna hun a hmang bawk a ni.
He hunah hian Buhchangphai SHG te leh zaithiam hrang hrang te zaiin, Govt. Middle School, Buhchangphai te atangin hnam lam mawitak entir a ni bawk.
