TURNIPUI Dt.26.01.2026 : Phullen Vengthar (Saitual District) Pastor Bial KTP Conference chhim tura Luangpawn atanga kal mi 3 te chu nimin chawhnu khan car-in an chesual (accident) a, a hmunah mi 2 thi nghalin 1 erawh a dam chhuak.
Nunna chante chu Car neitu leh khalhtu Lalthansanga (33) S/o B. Laltanpuia, Luangpawn leh Lallawmsanga (37) S/o H. Lalramvula te an ni a, Lalnunzira S/o Laldina (L) erawh vanneihthlak takin a dam chhuak a, amah pawh a biak theih niin an sawi.
Car chetsualna hmun hi Raipuar kawr vel niin hriat a ni a, kham sang leh chhengchhe tak a nih avangin chhanchhuah hna thawktute tan pawh chetlak a harsa hle a. An chetsual hun hi hriat theih chiah ni lo Pathianni chawhma inkhawm banah Luangpawn hi an chhuahsan niin hriat a ni a, kawng thlanga tlan liam an nih avangin an chesual tih hi hriat nghal mai loh nia ngaih a ni bawk.
Chetsualna hriat anih veleh khawtlang mipuite inpunkhawmin chhanchhuah hna thawh nghal a ni. Luangpawn atanga Phullen khua hi kilometre 19 vela hla a ni.
Car neitu Lalthansanga hi Luangpawn Branch YMA President nilai a ni a. Phullen damdawi inah Doctor an awm loh lai tak anih avangin Saitual damdawi in lamah postmortem an ti dawn nia thudawn a ni.
