TURNIPUI Dt. 11.02.2026 : Vawiin khan Horticulture, AH & Vety etc. Minister Pu C. Lalsawivunga chuan Kolasib District chhunga Horticulture Department hmalakna hrang hrangte a tlawh.
Minister hian chawhma lamah Centre of Excellence (CoE), Thingdawl tlawhin, helai hmuna Horticulture hotuten an hmalakna hrang hrangte lo entirin hun an hmang a.
CoE-ah hian Horticulture thiamna hmanga Tomato leh Strawberry chin dan te, pangang hmanga leitha siamna (Vermicompost) te, leitha atana bawng an vulh te leh pangpar an khawih dante Minister hi an lo entir a, hmalakna hrang hrangte uluk taka enfiahin zawhna awm ang angte Pi PC.Lalnghahsangi, Project Officer leh thawktuten an chhang a ni.
Centre of Excellence for Horticulture, Thingdawl hi 2013 a din ani a, 2015 ah hawn a ni. He centre in a tum ber chu quality planting material kuthnathawktute hnena sem chhuah a ni a.Nikum planting season ah khan Avocado, Dragonfruit, Papaya, M.Orange tiak te sem chhuah a ni. Nikum vekah khan a vawikhat nan curcuma pangpar variety hrang hrangte commercial a hralh chhuah a ni.Tin, Banakaih Research wing hnuaiah sawhthing semi-intensive leh terrrace cultivation hmanga enchhin a ni bawk. Brimato (Brinjal leh tomato) grafting hmanga hlawhtling taka zawm niin, a rah pawh a tha hle. Tun dinhmunah hian strawberry, tomato, Chinese cabbage, mau(rawthing) tiak te an nei mek a ni. He centre ah hian thlai te hi pesticide tello veka enkawl a ni a.Tin he centre in a tum ber chu one time use plastics hman loh hram a ni.
Horticulture Minister hian CoE Thingdawl bakah hian Pu Lalnunpuia, DHO Kolasib hovin Darnam Zau, Kawnpui-a balhla chinna hmun a tlawh a, kuthnathawktute hmalakna leh harsatnate a enpui a. Hei bakah hian Block Horticulture Office, Thingdawl leh Ginger Collection Centre, Thingdawl te a tlawh nghal bawk. Chawhnu lamah Pu Lalfamkima, Deputy Speaker Mizoram Legislative Assembly hovin Improvement of Link Road, Project Veng to Tuichhuahen Zau-a hmalakna te a enpui leh a, District Horticulture Office-ah officers leh staff te nen hun an hmang zui a ni.
Vawiina Horticulture hmunhma hrang hrang a en na ah Minister Pu C. Lalsawivunga chuan Department hmalakna hrang hrang a hmuh te chu tha a tih thu sawiin, thawktute leh inpekna a fakawm hle a ni, a ti . Kolasib District chu leilung hausakna leh thlai thar chhuah kawngah theihna sang tak nei a ni tiin, tun aia nasaa tan la thar turin a chah nghal bawk. Minister chuan Sorkar pawhin kuthnathawktute hmasawnna tur leh thar chhuah tih pun kawngah a tul ang angah hma a la zel dawn a ni, a ti.
Kolasib District Horticulture Office chanchin leh hmalakna tlangpui te hi lo tarlang tel nghal i la:
Kolasib District-ah hian Horticulture Department office hi hun eng emaw chen atang khan kalpui tawh niin, Divisional Horticulture Office-ah dt. 1.8.2003 khan hlankai a ni a. Hmasawnna hmu in bung thar a kai zel a, Divisional Office hi District Office-ah dt. 19.11.2020 khan hlankai leh a ni. Tun dinhmunah District Horticulture Office, Kolasib District hnuaiah hian Block Horticulture Office pahnih - Bilkhawthlir Block & Thingdawl Block a awm a. Officer leh Staff, a nghet leh casual te nen an hna an thawk mek a ni.
Tun dinhmuna hmalakna langsar zualte pawh tarlang ila:
Collection Centre & Chowkidar Quarters: NABARD Warehouse Infrastructure Fund atangin Bilkhawthlir, Kharzawlah Rs 68.5 lakh hmangin kum 2026 atanga hmalak tan a ni.
Improvement of Link Road: Project Veng to Tuichhuahen Zau-ah SASCI 2024-2025 hnuaiah Rs 1.8 Crore hmanga hmalak mek a ni.
Water Tank: Pre-Fabricated Collapsible Water Tank under MIDH 2024-2025 (1st & 2nd Installment) hnuaiah District chhung hmun hrang hranga install turin Unit 50 ruahman a ni.
Drip & Sprinkler System: RKVY-PDMC hnuaiah Kolasib District hmun hrang hrangah Drip leh Sprinkler install turin Unit 85 ruahman a ni a, hmalak mek a ni.
Cultivation of fruits and vegetables: Kolasib district chhung a khaw hrang hrangah thei leh thlai chin tur sem chhuah thin niin, a enkawl dan turah training pek thin a ni bawk.
Banana Ripening Chamber: Kawnpui Bangla Vengah Banana Ripening Chamber bun turin proposal submit a ni.
Vawiina Minister hun hman na hi Pu Lalfamkima , Deputy Speaker Mizoram Legislative Assembly; Pu CH. Lalmuanpuia, Director, Horticulture Department; Pu Manthanga Tochhawng, Deputy Director, Horticulture Department; Pu Vanlaltlana Zote, PS to Minister leh Kolasiba Horticulture Department Office leh Staff ten an tawiawm a ni.
