Report : Hriatpuia Pa
Vawiin, Dt. 18.2.2026 (Nilaini) dar 11:00 am khan Mizoram Journalists' Association, Kolasib District -te chuan Annual Conference 2026 chu Arunachal Pradesh khawpui Itanagar-ah an hmang a, President thar atan Pu C. Zomuanpuia an thlang.
MJA, Kolasib District Annual Conference-ah hian Rev. John F. Lalhmingliana, Presbyterian Kohhran Mizoram Synod hnuaia Field Secretary, Arunachal Mission Field West, Itanagar chu khuallian a ni a. Tunlai khawvela media-te hmasawnna, a tha zawng leh a chhe zawnga a nghawng te sawiin, khawvel leh Mizoram media boruak karah Kolasib media-te tha thlah lova tang zel turin a fuih.
Pu Andrew Vanlalauva, President, MJA Kolasib District pawhin thu sawiin, MJA member-te chu mipuite hnena chanchin thar pek chhuah kawngah tan lak a ngaih thu a sawi a. Tunlaiah Mizoram chhungah, an hausak chhan sawi chian hleihtheih loha hausa thar thut thut an awm te, zu leh drugs hluar zelte chu veiawm a tih thu sawiin, chanchinbu mite chotu a nih thu a sawi bawk.
MJA te hian District chhunga hmalak dan tur relin, Faina leh Zirna kawngah Kolasib District-in hma a sawn lehzual theih nan hma lak ni se an ti a. Anmahni pawl chhung bikah chhiat ni that ni inkaihhruaina thar ruahman ni se tihte an rel.
Kum 2026-2028 chhunga hruaitu turin heng mite hi an thlang -
President: Pu C. Zomuanpuia (Kolasib Aw)
Vice President: Pu Zairemchhunga (Bahzar)
Treasurer: Tv Lalnunmawia. (Duhlai)
Executive Committee member atan mi 5 an thlang chhuak nghal bawk.
1. Lallawmzuala (Vairengte Aw)
2. C. Zairemthanga (Zoram Kanan)
3. A Lalhrilhmawia (Turnipui)
4. Lalzuiliana (Kolasib Today)
5. RH. Lalherliana (Chhuahtlang)
