TURNIPUI Dt. 20.01.2026 : Nimin khan UD&PA Department, Kolasib leh Hmarveng Village Council te chuan Rengtekawn leh Zero Point inkar kawngpui kama bawlhhlawh paih an enfiah a, a hmun lova bawlhhlawh paih chu pawi an tih thu an sawi a; Kolasib Town Solid Waste Management Bye-Laws 2020 hmanga hrem theih leh Rs. 5000/- thleng chawi tir theih an nih thu an sawi.
Rengtekawn leh Zero Point inkar Bairabi road kawng sira bawlhhlawh paih khawm hi tute paih nge hriat theih a ni lova, Hmarveng VCP Laltlankima chuan a hmun lova bawlhhlawh paih awm thin chu pawi a tih thu leh hetiang hi awm tawh lo se a duhthu a sawi a. Lalkhawngaihi Inspector of Sanitation (IS) pawhin bawlhhlawh thehthang danah tan lak a tul thu sawiin, hetianga bawlhhlawh tawih thei leh tawih theilo thliar hrang lo leh Solid Waste Management Centre nil ova paih chu sim a tul thu a sawi.
Bawlhhlawhte hi a lan danah dawr bungrua lam ni lovin, mimal hnawm hnawk leh insakna bungraw hluite an ni hlawm a. Hmarveng VC te chu lo paihfai tura ngen an nih bakah, bawlhhlawh paih chhunzawm a nih lohna tura ruahmanna lo siam turin ngen an ni bawk.
Thudawn danin Kolasib khua hi bawlhhlawh sawngbawlna hmun nei hmasa pawl nimahse Solid Waste Management Centre-a bawlhhlawh paih tum ten pawisa an chawi thin avangin hetianga kawngkama bawlhhlawh paih hi an tam phah niin a hriat a. Heng bawlhhlawh paih tute hi Kolasib khawchhung mite mai bakah, sumdawng ten an bungrua lakna vai driver te an bawlhhlawh phurhlet tirin hmun remchangah an paih ta mai thin niin sawi a awm a ni.
