TURNIPUI February 5, 2026: Nimin khan DC Conference Hall, Kolasib-ah District Level Fire Prevention Committee chu an Chairman, Kolasib District Bawrhsap Pu Robert C. Lalhmangaiha hovin an thukhawm a. Kumin 2026 chhunga Kangmei Ven Beihpui (Fire Prevention Week) hman dan tur leh hmalakna hrang hrangte an rel.

He hunah hian Chairman Pu Robert C. Lalhmangaiha chuan thu sawiin, kangmei ven hi mitin mawhphurhna a ni tih hriatnawn a pawimawh thu a sawi a. Kan ramngaw, thing leh mau bakah nungchate chu kan khawvel ti nuamtu leh ti famkimtu an nih avangin, kangmei laka humhalh a tul zia a tarlang a. Kangmei chhuak hian thil pawi tam tak a thlen theih avangin fimkhur a ngai hle a ni, a ti.

Bawrhsap chuan kangmei ven kawngah sawrkar department hrang hrangte thawhho a pawimawh thu sawiin, a bik takin kawngpui siamtu NHIDCL te, Transport Department leh Forest Department te inkarah thawhhona tha a awm a tul thu a sawi a. Forest Department-in hma an lak thinna ah lawmthu sawiin, kuminah pawh tha taka hma la chhunzawm turin a chah bawk a ni.

Thutkhawmnaah hian Pu Aniket P. Gaonkar, IFS, DFO Kolasib chuan hun hman chhan leh tumte sawifiahna hun a hmang a. Nikum 2025 chhunga Kolasib District chhunga kangmei chhuak report te thlirletna neih niin, nikum khan kangmei chhuak palh awm mah se, vanduaina liantham, nunna chan leh hliam tuar erawh an awm loh thu tarlan a ni.

Nimina thutkhawmah hian thil pawimawh tak tak rel niin, kumin 2026 chhunga Fire Prevention Week hman dan tur ruahmanna siam a ni a. Hemi chungchang a thutlukna siamte chu:

Thupui (Theme): "Kangmei ven hi kan tu leh fa te hmakhua a ni".

A hun: February Ni 9, 2026.
A hmun: Parish Hall, Kolasib.
Khuallian: Pu Lalfamkima, Deputy Speaker, Mizoram Legislative Assembly.
Khualzahawm/Chairman: Pu Robert C. Lalhmangaiha, DC Kolasib.

Heng bakah hian District chhungah Fire Prevention lama khua hrang hrang tan inelna buatsaih nise tih a ni a, 'Best Performing Village' thlang tur hian Sub-Committee din nghal a ni. State Level Sub-Committee on Fire Prevention atanga inkaihhruaina (instruction) lo kal te pawh uluk taka thlirho a ni bawk.

Thutkhawmnaah hian DRDO Project Director Pu Lalmuanpuia, ACF Pu Jonathan, Pu H Lalramliana, SDO (Sadar) Koalsib , DEO, DVO, BDO Thingdawl, Govt. Kolasib College Principal, Addl. SP Kolasib te bakah Department hrang hrang hotute leh tlawmngai pawl (NGO) aiawhte an tel a ni.