Kolasib, 19th February, 2026: Vawiin khan DC Conference Hall, Kolasib-ah Kolasib Bawrhsap, Pu Robert C. Lalhmangaiha hovin National Highway thawmthat chungchang leh tun hnaia NHIDCL te laka pawl thenkhat in lungawilohna an lantir chungchanga hmalakna hrang hrang te thlirhona hun hman a ni.
He hunah hian Kolasib DC Pu Robert C. Lalhmangaiha chuan tun hnaia lungawilohna lantir a nih laia buaina lian zual a awm lohna atana thawktu zawng zawngte chungah lawmthu a sawi a. Kawng siam hna chu chak zawka kalpui tur leh an intiamkamna anga a hun ruat chhunga hlenchhuak ngei turin NHIDCL te chu a chah a ni. Hemi rual hian, sum a awm a nih chuan a hun takah contractor-te bill tangte pe chhuak turin NHIDCL thuneitute a ngen bawk. Bawrhsap chuan tlawmngai pawl, Village Council leh MJA te chu thawhpui chhunzawm zel turin a sawm a, mipui tana thil pawimawh tak kawng siam hnate chu lo enpui a, lo vilzui turin a ngen nghal a ni.
Kolasib SP, Pu Lalrinpuia Varte pawhin thu sawiin, buaina lian tham zawk a thlen loh nan Police-ten theihtawp an chhuah thin thu a sawi a. Muanna a awm theih nana Magistrate leh YMA-te thawhpuinaah lawmthu a sawi bawk.
Vawiin thlirhona hunah hian thu pawimawh tak tak sawiho a ni a. NHIDCL aiawhte chuan an intiamkamna anga an hna chu a hun taka zawh fel an tum thu leh an hmalakna tura an mamawhte an thlen nghal a ni. Kolasib Jt. VC aiawh, YMA leh MJA aiawhte pawhin an duh ber chu kawng tha neih a nih thu an sawi a, kawng tha zawk a awm theih nan sorkar leh NHIDCL te nena theihtawpa thawhho zel an inhuam thu an tarlang bawk.
He hunah hian Kolasib DC leh SP bakah Addl. DC Pi B. Malsawmtluangi, Addl. SP Pu K. Laltluangliana, SDO (Sadar), SDPO, Election Officer, Sub-Hqrs. YMA President, Kolasib Jt. VC Chairman, MJA aiawhte, NHIDCL aiawh leh an contractor-te an kalkhawm a ni.
