Meeting hmanpuitu Chairman Pu Robert C. Lalhmangaiha chuan Kolasib District chu Agriculture lamah theihna sang tak (potential area) a nih thu sawiin, kuthnathawktute hmasawnna turin officials kalkhawmte chu tha thlah lova tan la zel turin a chah a. District chhungah loneih lam kaihhnawihah tan lak thar a pawimawh thu a sawi bawk.
He hunah hian Member Secretary DAMC, Pu Joseph Lalnuntluanga, District Agriculture Officer (DAO) chuan report pe in, sorkar ruahmanna anga Sawhthing leh Hmunphiah lei dan tur duante a tarlang a. Nikum 2025 chhung khan sorkarin kuthnathawktute buh tharchhuah Quintal 1472 a lei thu leh, kuminah pawh tun dinhmunah Buhhum Quintal 350 lei tawh niin, tunkar chhung hian buhhum lei hi chhunzawm leh tur a nih thu a sawi.
Vawiin meeting-a tarlan a nih danin, Kolasib district-ah kuthnathawktute tharchhuah sawhthing leh hmunphiah leina hmun tur, Khawtinah Primary Collection Centre ruahman a ni a. Primary Collection Centre ten an dahkhawmna tur Secondary Collection Centre (SCC) chu hmun thum - Thingdawl, Saipum leh Vairengte-ah te siam niin, SCC atang hian a leitu turte hnenah hralh chhuah leh thin a ni ang.
Pu Joseph Lalnuntluanga chuan sorkar ruahmanna angin kumin February ni 2 atanga May ni 30 thleng Kolasib district-ah Sawhthing leh Hmunphiah lei a nih tur thu a sawi a. Hengte hi Primary Society member-te tharchhuah chauh, Secondary Collection Centre (SCC)-a an lakluh theih hun chhunga hralh te chauh sorkarin Price Support a pe dawn a ni, a ti.
Hmunphiah ro chu grade thliar lovin Kg 1 Rs. 80/- in ZOHANDCO-in a lei dawn a. Kuthnathawktu, hmun danga hralh duh zawk te tan erawh an duh duhna hmunah an hralh theih tur thu tarlan a ni bawk.
