TURNIPUI Dt. 28.01.2026 : Nikum 2025 chhung khan Kolasib leh a chhehvelah kangmei chhuak vangin Rs. 47,51,200/- hu In leh lo leh bungrua a kang chhia.
Fire & Emergency Services department, Kolsib Fire Station atanga thudawn danin, kum kalta 2025 chhung khan Kolasib leh a chhehvelah chenna In 4 leh ram 10 a kang a, kangmei chhuak avang hian mihring thi leh hliam an awm lova; chenna In leh ram bakah bawlhhlawh paihna hmun 2 leh lirthei 1 a kang thung.
Nikuma kangmei chhuakin thil a tihchhiat hlut zawng hi Rs. 47,51,200/- hu a ni a. Kangmei chhuaka bungrua leh thil dang kang chhe tur senghawi/humhim hlut zawng hi Rs. 23,30,000/- a ni bawk.
Hetih lai hian Mizoramah kumin 2026 January thla kal mekah kangmei chhuak vangin cheng nuai 42 hu In leh lo leh bungrua a kang chhe tawh a. January ni 1 atanga ni 23 thleng khan Mizoramah chenna In kang 2, ram kang 2, bawlhhlawh paihna kang 1, lirthei kang 1 leh Transformer/Distributor box kang vawi 2 a thleng leh tawh a ni.
Khua a thal chhoh leh tak avangin hmun hrang hrangah Kangmei chhuah thu hriat tur a awm chho leh ta zeuh zeuh a. Mizoram Fire and Emergency Services deptt chuan kangmei chhuah chhan tam ber chu fimkhur tawk loh vang a nih thu an sawi a, kangmei laka In leh a vel a him theih nan fimkhur theuh turin mitin an chah a ni.
Tun dinhmunah Kolasib Fire Station-ah hian thawktu Firefighter 5, Driver 2 leh IV Grade 1 an awm mek a. Harsatna nei be duh tan Ph No. 03837222322 leh 7627966100 ah biak theih reng an ni.
