TURNIPUI Dt. 09.02.2026 : Vawiin khan Parish Hall, Kolasib-ah ‘Nungchate chenna leh tui thianghlim min petu ramngaw, kangmei lakah venghim rawh’ tih thupui hmangin Kangmei laka fimkhurna Hapta (Fire Prevention Week 2026) hawnna hun hman a ni a. He hunah hian Kolasib Deputy Commissioner Pu Robert C. Lalhmangaiha chu Khuallian niin Hapta hawnna hun a hmang.
Khuallian Pu Robert C. Lalhmangaiha, Deputy Commissioner chuan thu sawiin, kangmei laka Kolasib District a lo him theih nana a hawnna hun hman a ni chu lawmawm a tih thu a sawi a. Kolasib District-ah khua 60 bawr vel a awm thu leh buh leh bal chinna leh huan lo ram thahnem tak a awm thu tarlangin, chung thlai chinna hmunhma zawng zawngte chu kangmei in reilote-ah a tihchhiat theih avangin kangmei laka venhim a pawimawh thu a sawi.
DC chuan fimkhur tawk loh avangin huan lo ram chauh ni lovin, kan chenna in leh kan rosum neihte pawh reilote-ah meivapah a chan theih thu a sawi a. Ram kangin thing leh mau, nungchate a tichereu in tuihna a titlem thin tih hriat a pawimawh hle a, ram tihkan avanga ramin a tawrhna chhutin fimkhur a hun tawh tak zet a ni, a ti bawk.
Fire Prevention Week hi kum 2000 atang khan kum tin thupui thlan bik neia hman thin a ni a, kumin hian thupui atan 'Nungchate chenna leh tui thianghlim min petu ramngaw kangmei lakah venghim rawh' tih hman niin, February Ni 9 - 13, 2026 chhung hman a ni dawn a ni.
Vawiin hun hmanna hi Pu Aniket P. Gaonkar, IFS, DFO Kolasib chuan kaihruaiin kalkhawmte thutiam sawirualna hun a kaihhruai a. Pu H. Vanlalnghaka, Honorary Wildlife Warden, Kolasib chuan kangmei laka fimkhur a pawimawh dan chungchang a sawi a, Pu Jonathan Lalhruaitluanga, AFC, Kolasib Forest Division chuan lawmthu sawina neiin vawiin hun hi khar a ni.
