NI 13.01.2026 (THAWHLEH NI) NEWS:
1.TRUMP CHU VENEZUELA ACTING PRESIDENT-AH A INPUANG TA: Niminpiah chawlhni, ni 11. 01.2025 khan Donald Trump chu ama Social media site Truth Social-ah a Official thlalak a post-na hnuaiah a designation a ziakah chuan "Acting President of Venezuela tih leh 45th. leh 47th. President of United States" tih a post.
Trump chuan, "U.S. chuan Venezuela chu ram him leh dikna kenkawhna ram a nih hma loh chu U.S. hian a awp rih dawn. Mi tu emaw a thinlunga Venezuela hmakhaw thatna tur ngaihtuah lotu in he ram a awp hi kan remti dawn lo," a ti.
Kar hmasa khan Venezuela Vice-President leh Oil Minister Delcy Rodriguez chu dan ang thlapin an ram Interim President atan chhe chham tir a ni bawk si a, President lailawk 2, thu zawk leh thu lo zawk an nei ta a nih hmel.
Trump chuan, "Venezuela high quality sanctioned oil barrel maktaduai 30-50 chu market rate in U.S.-ah hralh a ni thin ang. A hralhna man sum United State President ka nihna angin ka control anga, Venezuela leh U.S.mipuite thatna/hmasawnna atan hman a ni ang. Tui alhthei phurtu lawngte chuan U.S. lawngchawlhnaah an rawn phurlut anga, chutahchuan unload a ni thin ang," a ti.
Trump chuan sawi zawm zelin, "Venezuela interim leader Rodriguez chu an President man tak Maduro thawhpui thin nimahse tha takin kan thawk duna, ka duh dan angin oil chungchangah pawh tha takin kan thawk dun a a ni," a ti.
Oil chungchangah hian Trump hian Rodriguez hmuh a tum a. Vawin emaw naktuk emaw hian Opposition hruaitu leh Nobel Peace Prize dawngtu Maria Corina Machado pawh a hmu dawn tih a sawi. Machado hian Nobel Peace Prize dawn chu Trump pek emaw intawm emaw a duh thu a sawi a. Mahse Norwegian Nobel Committee chuan Nobel Prize sum ken tel hi midang tu hnenah pawh a dawngtu hian a pe thei a, mahse a Nobel Prize tak hi chu midang hnena pek emaw intawm emaw phal a ni lo," a ti nghal hmiah mai.
2.IRAN PROTESTR KAH HLUMTE CHU 599 AN TLING TA: Iran Sorkar dinglai paihthlak duh avanga ram pum buaina chu a punlun zel a. Hemi avanga thi pawh a tlem berah mi 599 an tling tawh a, heng thi zinga 89 chu security force member an ni tiin U.S.-based Human Rights Activists News Agency chuan a sawi a, Protester man pawh 10,600 aiin an tam tawh niin a sawi. Buaina hian reh lam aiin a punlun zawngin a kal mek. Protester nuai tam tak kawng zawhte chuan Office, in leh motor tam tak an hal duai duai mai. "Dictator chu thi rawh se. Rehza Pahlavi dam reng rawhse," tiin an sakhaw hotu leh Supreme Leader Ayatollah Seyyed Ali Khameni an duh loh zia leh an lal tlawm ta fapa an duh zia an au chhuah pui dur dur mai a ni.
Hetihlai hian mipui tam tak, Sorkar tantu lam chuan nimian thawhtan, January ni 12 khan kawng an zawh mup mup mai.
Kar hmasa zirtawpni khan U.S. President Donald Trump chuan, "Hetianga mipui pawi sawi lo thah buai buai an nih chuan America chu anmahni chhan turin a thawk chhuak ang," tiin Iran Sorkar chu a vau a. Trump hi a inrawlh tak tak pawh rin a ni a. Chu chu Iran mipuite hian an huaisen phah hle ni a hriat a ni. Venezuela President Maduro leh a nupui Trump'an a man avang khan Iran mipuite chuan Trump hi an thlamuan pui leh zual hle a ni.
Tunah chuan Iran Economics chu a tla chhe ta tak zet a. An sum hlutna tlak hniam dan chu na men a ni lo. U.S. dollar 1 leh hi Iran Rial 9,99,212 hen a ni. Vawin phei kha chuan U.S. dollar khat hi Iran Rial maktaduai 1.46 hen a ni. Thil man to zia leh an tangka hlutna tlak hniam zia chu sawi hian a siak ta lo.
I lo thlir phawt mai ang hmiang.
T. Sangkunga.