1.MINISTER HLUI ACB IN AN CHHUI: Nimin piah thawhlehni khan Rajasthan BJP leader Mahendrajeet Singh Malviya Minister hlui chuan Congress a lokir a tum thu Rajasthan PCC President Govind Singh Dotasra hnena a sawi atanga ni 2 pawh tling loah ACB ten a in an dap nghal.


Malviya chuan, "BJP-ah chuan tuman miretheiten an harsatna thlen ngaithla peih an awm lo. MGNRGA lah a thla tel an batsak a, loneitute lahin fertiliser an tlachham a, Congress chauh lo chu Tribal mite harsatna sukiang tur an awm lo," a ti.


2.DENMARK LEH GREENLAND FOREIGN MINISTER-TE BEIDAWNG: Nimin nilai, January ni 14, 2026 khan White House-ah Greenland U.S.A. kuta hlan chungchangah Denmark leh Greenland Foreign Minister-te leh U.S. President Donald Trump leh U.S. mi pawimawh thenkhatte an in hmu. Denmark leh Greenland palaite chuan Greenland-ah hian U.S. hian a duhtawkin sipai hmun chu khuar sel a, lei chhung hausakna pawh haichnuak sela, a Island pum erawh hi chu an ramah rinlut lo se tiin an rawt a. Mahse chu rawtna chu U.S. paliaten an pawm thei lo.


Denmark Foreign Minister Lars Lokke Rasmussen chuan, "Kan inbiakna chuan a tha zawngin hma a sawn a, a tum bulpui berah erawh kan inrem theih lohna (fundamental disagreement remains) a awm," a ti.


 Denmark Foreign minister chuan, "America in Greenland neih a tum tlatna rilru hi kan sawh sawn thei ngang lo a ni ber mai. Keini pawhin engtikawngmahin Greenland pumpui midang hnena pek hi chu kan remti dawn lo tih chiang takin kan hrilh khawl mai. U.S., Denmark leh Greenland chuan High-level Working Group a din anga, an in hmukhawm leh thuai ang," a ti.


Senator Jeanne Shaheen, New Hampshire top Democrat Senate Foreign Relations Committee leh Republican Lisa Murkowski, Alaska Senator chuan NATO member ram chu U.S. in sipai chakna hmanga lak awih miah lohna dan siam tura rawtna (proposed legislation) an buaipui ta tlat mai.


3.GREENLAND HI PAWISA IP MAWNG PAWP A NI A NGEM? : Greenland mihring 57,000 chengte hi an awm darhsarh hle a. An khua tlawh tur hian helicopter hman zel a ngai a. An ram 80% hi vur in a khuh tlat bawk a. Khawsak a hautak em em a. An khawpui ber Nuuk-ah chuan Golf khelhna a awm a, chutah chuan an khaw mite an infiam thin. Thai hotel tha tak a awm bawk. Thingtlang mite hlawh chu khawpui mite hlawh aiin 50% in a tlem a. An inbualna chu vur tui a ni. Greenland hi khawvela thliarkar lian ber a ni a, Mexico ram pumpui aiin a zau deuh hlek a ni. Kawng (paved road) an neih belhkhawm sei zawng chu mel 100 aiin a tawi.


Greenland hi Denmark sorkar hnuaia semi-Autonomous territory a nia. An ram workforce hi State enkawl an ni. An ram awptu Denmark sorkarah hian an innghat nasa em em a. Denmark hian Greenland grant Greenland revenue zatve leh an thliarkar GDP 20% kumtin a pe thin. Chubakah Police, Court leh banking regulator-te enkawlna a tum bawk a, free healthcare a ruahman sak cheu bawk a ni. Chubakah Foreign Affairs leh Defence lam enkawlna hi Denmark chan ala ni ta cheu a. A senso belhkhawm chu kum tin dollar tluklehdingawn khat aiin a sang thin niin Greenland Economic Council Chairman, Torben Anderson chuan a sawi. Anderson chuan, "Denmark in a tinsan chuan, an ram enkawlna chu zan khatah a boduak dawn tihna a ni a, thil mak tak a ni ang.


Heng Denmark sorkar senso hi U.S. in tum vek ta se Greenland chu America Federal Government senso mi 1 zel a dawng tam ber a ni anga, Alaska emaw Washington D.C. emaw a Federal Government senso aiin a tam zawk dawn a ni. 


Trump'an, "Greenland hi U.S in a neih loh chuan China emaw Russia in emaw a nei ang tih pawh hi Denmark Official chuan a pawm lo hle a. "China hian Greenlad neih lam hi a ngaihsak ngai reng reng lo a. Russia lah hi Ukraine  indona avangin a in sengso nasa em em a, lawnga Greenland kal thlen pawh an tan a awlai lo ang. Chuvangin Greenland neih han ngaihsak chi ziazang an ni lo. Chubakah an khawpui Nuuk-ah inter national airport sak a ngai dawn lehnghal," a ti.


Leilung hausakna haichhuak tur hian vur chhah takin a khuh luk hnuai a lei laih tur hautak tak a awm a, kawng laih leh thawktu enkawlna damdawiinte a mamawh ang. Chuchauh ni loin Greenland sorkar hian kum 2021 atang khan oil leh gas laihchhuahna tur license pek manah moratorium a phut lehnghal a ni.


Chuvangin Trumpuia it ber Greenland lei chhung hausakna lakchhuah man hi a sang hle dawn a. Sum bawm mawngpawp a tanka thlak ang a ni hial a ngem? tiin Max Colchester chuan a ziak.


T. Sangkunga.