Pawla’n uitu a ngah, YMA Branch ten sunna thuchhuah nen an thlah

TURNIPUI Dt. 11.02.2026 : Nimina thi Vanlalpawla (70), Diakkawn Kolasib chuan uitu a ngah hle a, social media hrang hrangah amah uituten thu an post bakah, Kolasib khawchhunga YMA Branch thenkhat ten uina thuchhuah nen an thlah a; hetiang hi thil thleng zen zen lo a ni.

A awmna veng Diakkawn Branch YMA chuan midang chunga an la tih miah loh leh a vawikhat nan Diakkawn YMA Hall-ah Pawla hi an vui dawn a. New Diakkawn Branch YMA chuan thuchhuah siamin, ‘’He chhiat tawhna hian min thawng na hle a, kan hrilh a hai takzet a ni. Lusun khawharte hnema Kolasib khawpui suar tluan thintu, mi bik hetia lei daia zalh a ngai ve ta hi kan ui bang thei lo a ni. Hetiang mi ropui thlah liam a lo tul ta mai hi kan sun tak meuh meuh a ni. A mihringpuite tana a inpeknate, a taksa pawh ngai pawimawh thei lova midang tan a inhlanna kha kan ngaihlu takzet. A hmun ruak luah zo tur hi an awm  kan ring lo hial,’’ an ti.

Kolasib Venglai Branch YMA pawhin sunna thuchhuah siamin, ‘’Khawhar lusunte tana thahnemngai, khawi vengah pawh neitu chan changa kal thin chuan min kalsan ta. Venglai Branch YMA chuan kan uiin kan la thlahlel hle a. Chutih rual erawh chuan natna awm tawh lohna Pa angchhungah thlamuang taka a chawl ta erawh kan lawmpui hle,’’ an ti.

Kolasib Tumpui Branch YMA pawhin Pawla sunna thu hi chhuahin, ‘’YMA tana tangkai leh Kolasib Arsi lian chuan chatuan ram min lo pansan ta. He thihna hian Tumpui Branch YMA chu min thawng takzet a, lusun khawharte hnem thintu Kolasib Arsi lian kan thlahliam a lo tul ta mai hi hun lo kan tiin kan sun tak meuh a ni. Khawharte hnem tura a inpekna te, midangte tana malsawmna thlen thintu a nihna te kan hre reng ang,’’ a ti a ni.

Nimin lama tarlan tawh angin Vanlalpawla hi nimin chawhnu dar 2:30 PM khan stroke avangin Kolasib ah a thi a, vawiin chhun dar 12:00 hian Diakkawn YMA Hall-ah vui a ni ang. Pawla hian kum tam tak chhung chu Kolasib khawchhung leh khaw chhehvelah a dam phawt chuan mitthi leh khawhar inah a kal thin a, a bik takin lumen zanah hmaih lovin zanlaiah Pathian thu leh thuchah pawimawh dangte a sawi thin a ni.