TURNIPUI Dt. 21.01.2026 : Kolasib Rengtekawn Banglalui peng kawnga ram neitu pakhatin a ram nia a chhal a pin (block) avanga Joint NGO Rengtekawn Kolasib leh Quarry Owner Asssociation ten Kolasib DC hnenah complaint an theh luh chu nimin khan a hmunah Magistrate Lalthanzuala Sub-Deputy Commissioner, Kolasib chuan a enfiah a, hawng tura thu a pek anga hawn nghal a ni.
Mimal ram chin nia chhal kawng an dan pin hi tunhma atanga vantlang kawnga hman thin a nih thu thudawnna chuan a sawi a. Mi thahem takin an eizawnna panna kawng anih avangin nitinin an zawh thin a. He kawng piahah hian Fisheries Department leh Kolasib District Teakwondo Association pawhin hmunhma an neih bakah, chhungkaw 6-in lung quarry an nei a. Chhungkaw engemaw zatin an huan lo ram panna atan an hman mek bakah tunhma chuan PHE-in tui pump an dahna a nih vangin a panna kawng ber a ni bawk.
Banglalui panna kawng ram hi Albert Vanlalliantluanga hminga pass siam niin Lalrinliana, Kolasib Venglai hnenah hralh a ni a. A ni hian N. Lalbawiha h/o Phalhawihi, Rengtekawn hnenah an hralh veleh a. Four Lane kawngpui laih mekah company ten helai kawng paltlang hian an bungrua dahna atan Fisheries ram an hmang hawh a, kawngte siam thain; motor-in an zawh tak fo avangin tuna a neitute hian an leina te hnenah hian an ram chin an hung tur leh an tihtheih loh chuan ram an inlei tawh pawh thleng leh mai an tum thu an hrilh a. Hemi vang hian Inrinni kalta January 17 khan a neitu hmasate chuan kawng hi an rawn ping/block ta a ni.
Helai kawng hmangtute chuan kawng pin/block a nih vanga an eizawnna tihtawp a ni chu an hriatthiam loh thu an sawi a, kawng chu tunhma atanga vantlang ram ni reng thina an ngaihthu sawiin; District bawrhsap Robert C Lalhmangaiha hnenah complaint an thehlut a. Chumi thu kal zelah Magistrate Lalthanzuala, SDC chuan helai hmun hi tlawhin kawng pin/block pawh a thiah tir a, "Vantlang tana harsatna siam chu danin a khap tlat a, a neitu lam atang chuan feet 1 lek ram chan pawh a uiawm a; mahse helai hmun hi tunhma atanga vantlang kalkawng niin a lang a. Tha taka sawiho theih a nih laia vantlang dodal zawnga chet hi a tha lova, tunhnuah chuan chhunzawm tawh lo turin kan in ngen a ni," a ti a. Dan pela chetna a awm chhunzawm zel chuan pass cancel sak thlenga hmalak theih a nih thu a sawi bawk.
Nimina kawng enfiahnaah hian kawng hmang thintute leh an hnathawk mi 50 vel an tel a, SDC hi Kolasib SDPO R. Lalnunpuia leh khawtlang hruaitute bakah thuthar thehdartuten an tawiawm a ni.
