Central YMA Road Monitoring team te chuan nimin khan Sairang leh Bilkhawthlir inkara kawng siamtute hmalak dan an rawn enfiah a, J Infratech hotu Amit-a leh NHIDCL ten tawiawm in chawhnu dar 1:30 khan Kolasib Sub-Hqrs YMA Road Monitoring team ten SHYMA Committee Room-ah an lo dawnsawng a ni.
He hunah hian Kolasib SHYMA Road Monitoring team te’n an hmalakna hrang hrangte report lo pe in, Bilkhawthlir leh Kolasib inkar kawng siam chungchanga Contractor te lehkha an pek (hnuhnung ber) chungchang pawh sawi lan a ni a, an hmalakna ten hma a sawn theih nan Central YMA Road Monitoring team te pawh contractor te nawr pui turin an ngen nghal a ni.
Meeting zawh hian Kolasib Tuithaveng kawng siam mek chu an enho nghal a. Hetah hian DBM phah lai chu Road roller in a chil mam hma in temperature alo hniam deuh avangin 207 trip khat vel bawr chu paih fai tir a ni a, hemi zawh hian Rengtetlang thleng kal in J. Infratech te hmalakna an en nghal a, an term tawp hma April 30, 2026 a zo fel thei turin J. Infratech lam hian an insawi a ni.
Contractor te hian CYMA Road Monitoring team te hnenah hian Kawng siam chungchangah endiktu/monitor tu an ngah thu leh an hna a tihkhaihlak ve thin thu an lo thlen a. CYMA lam hian Kolasib SHYMA Road Monitoring team te chu Contractor te lo tawiawm tha turin an ti a. Contractor te pawh an mamawh ang te chu SHYMA ah lo thlen zel turin an chah nghal bawk.
