TURNIPUI Dt. 02.02..2026 : Prime Minister Narendra Modia chuan Union Budget chu mihringte lam awn leh India in insiamthatna kawng a zawh mekah a bulthut tinghettu leh kawng sialtu anih thu a sawi.
PM Modia chuan nimina Union Budget pharh tak chu chhinchhiah tlak a tih thu sawiin ram than zelna tur leh hun rei zawka hmasawnna turah a nawrkaltu pawimawh tak a ni a ti a. Pu Modia chuan budget-a rawtna awmte chuan ram sum dinhmun a tha zawngin a ti che ang a, mipuite dinhmun a chawikan bakah thalaite tan remchanna thar a siam dawn a ni a ti.
Union Finance Minister Nirmala Sitharaman-i chuan nimin khan Union Budget 2026-27 chu Lok Sabha ah a pharh a. Pi Sitharamani chuan a budget pharh chu Thalaite tha chakna in a kaihhruai anih thu a sawi a. Mawhphurhna chi thuma innghat anih thu sawiin ram eibar zawnna ti thangzel turte, mipuite tana thiam leh theihna siamsak a, an mamawh bungrua leh tul dang pekte leh chhungkua, hnam, sakhua, hmun hrang hranga awmte leh eizawnna chi dang dang khawih mekte tana remchanna thar siam an nih thu a sawi a. Pi Sitharamani chuan damdawi siamchhuah lam hmasawnna turin Biopharma SHAKTI an ruahman thu sawiin hemi atan hian cheng vaibelchhe sing 1 dah a ni a,. kum 5 chhungin India chu Biopharma hmunpuiah siam an tum a ti.
Budget-ah hian khadi, handloom leh handicraft tihchakna tur Mahatma Gandhi Gram Swaraj kalpuina turte, Textile Sector tana National Fibre Scheme leh National Handloom & Handicraft te thuikhawmtu tur, Integrated Programme hnuaia Mega Textile Park din tura rawtna te a tel a, National Institute of Pharmaceutical Education & Research thar 3 dinna tur leh institute awm sa 7 thuam thatna tur a tel bawk.
Budget tharah hian cancer natna veite enkawlna damdawi chi hrang hrang 17-ah chhiah tih bo a ni a, ramdang atanga damdawia inenkawl duhte an pun chhoh theih nan Regional Medical Hub 5 din a ni dawn a, All India Institutes of Ayurveda thar 3 din tum a ni bawk. Arunachal Pradesh, Sikkim, Assam, Manipur, Mizoram leh Tripura-ah Buddhist Circuit tihhmasawnna tur scheme kalpui tum a ni a, Tezpur leh Ranchi-a rilru lama harsatna neite enkawlna hmun, National Mental Health Institute-te chu Regional Apex Institution dinhmuna hlangkai turin thuam that tum a ni bawk.
Pi Sitharamani chuan kum 2026-27 ah hian fiscal deficit chu GDP atanga zaa 4.3 a nih tur thu sawiin kum hmasaa zaa 4.4 aiin a tlem a ti bawk. National Statistics Office in a chhutna hamsaah chuan ram sum dehchhuah GDP chu kum 2025-26 ah zaa 7.4 turin a chhut tih a sawi a. Nominal GDP hi zaa 8 turin a tarlang a ti bawk.
