Nizan Dt.23.1.2026 (Zirtawpni) khan Dawrpui Multipurpose Hall ah YMA Kumpuan "RUIHHLO DO" chungchanga hmalak dan tur ah Central YMA buatsaihin Aizawl Khawpui chhunga Branch OB te nen Inrawnkhawmna hun hman a ni.
Pu R. Lalngheta, President, Central YMA chuan inrawnkhawmna hun hi a kaihruai a, Prof. Malsawmliana, General Secretary, Central YMA chuan kal khawmte inhmelhriattir na leh thupuan tur awm te a puang a. Pu Vanlalsawma, CEC in hunserh a hman hnuah Prof. Lalnuntluanga, Vice President, Central YMA in Thupui sawi hawnna hun a hmang a ni.
Thupui sawi hawng tu Prof. Lalnuntluanga chuan, "Ruihhlo avanga kan ṭhalai tam t ak nunna chân ta te leh tuna ruihhlo in a bawhbuai mek te avang te, kan ṭhalai ruihhlo la ti velo te ven himna atan ruihhlo do hi YMA te chuan kan tih makmawh kan kova tla alo ni ta" a ti.
He inrawnkhawmna hun ah hian Branch YMA OB kalkhawmte atangin rawtna hrang hrang ngaihthlak a ni a, hetiang hian hmalakna tur khaikhawm a ni.
1. Ruihhlo Do na atan Aizawl khawpui chhunga Branch 111 te Zone hrang hrang 10 ah inṭhen nise.
2. Zone huamchhunga Branch te aṭangin Zone CADS Member tur mi 3 theuh ruatchhuah tur ani.
3. Zone ṭhenfel / siamfel leh Zone hruaitu ruat chu Central YMA hruaituten ruahmanna an siam ang.
4. Zone hrang hrang hmalak tan hun chu Central YMA in ruahmanna a Siam ang.
Pu R.Lalngheta, President chuan ruihhlo do kawngah Branch YMA te pheikhai rual taka kal a tul thu te, fimkhur tak leh huai taka kal a ngaih dawn thu te; ruihhlo a sumdawngte pawh pal an ngaih chuan pal a tul thu a sawi bawk.
He hunah hian kum 2025 YMA Inkhawmpui Lian Rorel zinga pakhat "YMA NIHPHUNG INHRILH THARNA HUN HMAN ṬHIN NISE" tih bawhzui nan YMA nihphung in hrilh tharna hun hman ani a, Er. H. Duhkima, Treasurer, Central YMA in he hun hi a hmang bawk.
Hun hmangtu Pu Duhkima chuan, "YMA chu Pathianin Mizo hnam phuarkhawm tur leh Kristianna leh Zonun zemawi vawng him tlat tura min pek a nih avangin Mizoram leh hnam hmangaihtute kan ni a, YMA tello chuan Mizoram dinhmun tur hi ngaihtuah ngam pawh anilo hial awm e." a ti.
He inrawnkhawmna ah hian Branch 111 atanga aiawh kalkhawm te, CEC Memberte leh Central YMA OB te an tel a, Sawmtea Chhangte chuan kalkhawm te zaiin a awi bawk.
