Education Minister Dr. Vanlalthlana chhungkhat hnai Mizoram State University function huna thawk tur hna laka tlingte MPYCC in a lawmpui.
Mizoram Pradesh Youth Congress Committee (MPYCC) chuan thuchhuah siamin, Lungleia dah tur Mizoram State University (MzSU) building pawh la sak loh a nih laia thawktu tur lak dan chu mak an tih thu tarlangin, Education Minister chu anmahni chhungkaw list leh ZPM party list anga hna lakah a chak fal hle nia an ngaih thu an tarlang.
MPYCC chuan tun hnaiah Mizoram State University building pawh la sak loh, engtika bul tan tur nge tih pawh hriat a la nih loh laia thawktu tur, Group D atana Education Minister chhungkhat hnaite leh a bial chhunga ZPM mi leh sate hmanhmawh leh hnawhsarum taka lak fel vek an ni chu mak an tih thu an tarlang a ni.
Congress Thalai chuan tunlaiin thalaite tan eizawnna tur a vang tawh hle niin an thuchhuahah hian an tarlang a, hmanni lawka Police constable mi 200 lakah pawh diltu lehkhathiam mi sing tel an awm tih an tarlang bawk.
Mizo thalai lehkhathiam hna zawng mek, Mizoram State University ah hna ruak dil theih a awm tih hre lo sing tel an awm laia hna lo dil a, interview-a lo tling bik te chu MPYCC chuan vannei an tih thu leh an lawmpui tak zet thu an thuchhuahah hian an tarlang a. 2018 MLA inthlan dawn leh 2023 MLA inthlan dawna an thu tiam, chhung leh khat induhsakna laka fihlim tura an intiamna huaisen taka bawhchhetu Education Minister Dr. Vanlalthlana chu MPYCC chuan an lawmpui thu an tarlang a ni.
