Chibai.
Lawm leh chhuanawm ti tak chungin Mizoram leh ram chhung mipui zawng zawngte inzavaiin state puitlinga Mizoram hlankai a nih ni hun duhawm takah hian chibai thami ka buk vek a che u.
February ni 20, 1987 khan Mizoram chu India ram state 23-na ni tura puan a ni a, hemi hnu hian Mizoram chuan muanna, hmasawnna leh hlawhtlinna kawng hrangin a zawh chho a ni. He ni chhinchhiah tlak tak hi mizo mipuite chhelna, inpumkhatna leh suangtuahna ataka nemnghehna chiang tak a ni. Dawhkan kila inbiakna, mipui thlan rorelna leh inremna ataka tihhlawhtlinna lantir a ni a; hei hi chiang takin June ni 30, 1986-a Sawrkar laipui leh Mizo National Front-te inkara inremna thuthlung ziah khan a entir a, he inremna hi India ram chanchina inremna thuthlung ziah tawha hlawhtling leh tlo berte zinga mi a ni.
State nih hnuin Mizoram chuan kawng tinrengin hmasawnna hmel thar chhinchhiah tlak tak tak a hmu a. Ram pum huapa hriat a hlawhna em em hnam ziarang hausa tak, nunphung nghet tak leh khawtlang inlungrualna hloh chuang lovin zirna, hriselna, hmasawnna ruhrel din leh ngelnghet siam kawngah pawh nasa takin hma a sawn a ni.
Tunhnaia hmasawnna langsar zual zingah chuan September ni 13, 2025-a Prime Minister-in a rawn hawn tak km 51.38 a thui Bairabi-Sairang rel kawng hawn kha niin, hei hian a vawi khat nan Aizawl chu India ram khawpui dangte nen rel hmanga thlunzawm a ni. He hmasawnna hian zin veivakte remchanna siam sakin man tlawm zawka zin, bungraw phurh leh khualhip thlengin nasa takin danglamna a siam a, khualzin pawh kum kalta khan 139.5% laiin a pun phah a ni. Hemi belhchhah tur hian tunhnai lawk February ni 9, 2026 khan Silchar-Sairang inkar tlan rel pawh hawn niin, hei hian rel hmanga inkalpawhna a tihchangtlun phah a ni.
May ni 20, 2025 khan Mizoram chu ULLAS hmalakna hnuaiah 98.20% lai hmuin India rama ziak leh chhiar thiam vekna state hmasa ber atana puan a ni a, hei hi zirna huapzo leh thuamchak kawnga hlawhtlinna mellung pawimawh tak a ni. India Skills Northeast Regional Competition 2025-26 neih zawh takah Mizoram chu pakhatna niin, hei hian thiamthil leh theihna Mizoramin a neih tam zia leh hai chhuah hmabak pawh a la awm nual tih a tarlang a ni.
Sawhthing quality tha, leichi hmang lo deuh vek thar chhuah tam avang leh chin uar deuh deuh anih avangtein nikum December thla khan NITI Aayog chuan Mizoram chu sawhthing khawpui "Ginger Capital of India" atan a puang a. Mizoram hian leichi tel lo buh leh thlai bakah ramhmul damdawi, thlai rimtui, mau, oil palm, rubber leh inghahna tlak dangte tam zawk thar thei turin theihna nasa tak a nei a ni.
Kumin National Voters' Day, January ni 25-a lawmah khan Mamit district chuan inkaihhruaina 'Model Code of Conduct' a kenkawh that avang leh dan bawhchhiatna lian tham a thlen loh avangin India rama inthlanna kalpui tha ber lawmman "Best Election District Award" chu India President kut atangin a dawng anih kha. Hei hian mipui thlan rorelna tundin kawnga pawimawh tak inthlanna zalên, felfai, dik leh langtlang siam kawngah Mizoram chu nghet takin a ding tlat tih a tarlang chiang hle awm e. Infiamma kaltlanga khualhip nan Aizawl International Half Marathon tum hnihna chu February ni 14, 2026 khan hlawhtling taka huaihawt niin, ram chhung leh pawn atangtein he marathon hian chhimtu thahnem tak a nei a ni.
State ralmuang tak, mawi leh hnam ziarang hausa, khawtlang inlungrual, sik leh sa nuam, fai leh boruak thianghlim thlenga nei anihna hi Mizoram thangmawina leh mite ngaihhlutna a ni a. Traffic nundan mawi tak leh horn pek lohna a nite hi India ram pum ang pawha mite ngaihsan leh sawi zui nasat a ni. Heng kan hmingthatna leh vanneih biknate hi chhawmnung turin theihtawp chhuah zel ang u khai.
Mizoram hi India ram hmun pawimawh taka awm a ni a. Chhak lamah Myanmar leh thlang lamah Bangladesh ram te'n an kar cheh tlat avangin, khawvel dinhmun inher danglam zel leh India ram Act East Policy kalpui mekah Mizoram hian dinhmun pawimawh tak a luah a ni.
Ek Bharat Shreshtha Bharat thiltum hre reng chungin mitinte mahni hnam nihphung hloh chuang lovin, inpumkhatna leh inlaichinna tha zawk a awm theih nan ram chhunga cheng hnam dangte nunphung, tih dan leh hnam ziarangte zah saka ngaihven turin ka sawm vek a che u.
He ni danglam bikah hian Mizoram leh India ram chak leh hmuingil din turin inhlan thar leh theuh ang u. Hawh u, tanrualna leh inremna nen kan thil rochun kan ram leh hnam vawnghim zel chungin hmasawnna kawng zawh ila, kum 2047-a India ram intodelh leh mahni kutkea ding thei 'Viksit Bharat' siam turin mahni phak tawkah tha i thawh theuh ang u khai.
State puitlinga Mizoram hlankai ni pual hian chibai ka buk nawn leh vek a che u.
Jai Hind
Ka lawm e.
