Aizawl; the 26th February, 2026: Vawiin khan Aizawl DC Pisapui Hall-ah kan hma lawka Aizawl Municipal Corporation (AMC) inthlanpui lo awm tura Official te: Municipal Returning Officer (MRO), Asst.MRO, Election Officer leh Nodal Officer te tan State Election Commission, Mizoram chuan ni khat awh Training a buatsaih.
Training hawnna thuchah sawiin State Election Commissioner Dr. H.Lalthangliana chuan Sawrkar hnathawk tan chuan sawrkarna fawng chelhtu tur te thlanna tur thil a nih avangin, Election hi a sawrkar hna hliah hliah a, Election lai chuan Election duty tluka hna ngaih pawimawh tur a awm lo. SEC in Election official tura appointment order a chhuah tawh chuan Sawrkar hnathawkte hi SEC hnuaia awm in ni tawh a ni. SEC chuan he official hi a office hnaah a buai viau a ngem tih a ngai tuah lo, a efficient a ngem tih chauh a ngaituah. Chuvangin SEC in a rinngam \hah official thlan khawm in ni a, AMC election hi felfai taka inkalpui thei SEC chuan a ring nghet bur a ni. Election hi huhphurh zawnga lak tur a ni lova, rilru zangkhai tak, fimkhur tak leh Confidence neih taka festival anga ngaia, hmachhawn tur a ni zawk. Election laia thil tihsual neih zeuh thin official te hi, experience ngah tak leh over confident te an ni tlangpui zawk. Chuvangin confident tak, mahse over confident silova election hi hmachhawn tur a ni, a ti.
SEC thuneihna sawi langin, Dr.H. Lalthangliana chuan SEC,Mizoram hi Mizoram sawrkar hnuaia function a ni lova, political party thu hnuaia awm an ni hek lo. Inthlan chungchangah chuan Political Party te chu SEC thuhnuaia awm an ni zawk. AMC Inthlanpui leh Budget session awm bichilh lutuk thin hi; hmalam hun lokal zel tur atana siam rem tha in AMC chuan a hria a, tuang tichha in AMC-2026 Election hi a sawn hla mai a ni. SEC chuan political party te hnenah a tul chuan thurawn te pawh la ang, mahse SEC chuan tha ber tura a hriat angin a kal mai, chu chu SEC inngahna principle a ni. SEC hian sawrkar leh political party ngaih dana kal hi a ba lo, a ti.
Trainees te fuihna thuchah sawiin, Dr.H. Lalthngaliana chuan India Dànpui pawh kum 3 chuang mithiam ten an ziah kha, vawi engemaw zat siam that a ni tawh a ni. Dân hian engkim a tuam si se seng lo, dân-a awm lo (between the lines) hmanga thutlukna siam a tul hunah chiah hian in efficiency a lang ang. Dân hi a taksa leh thlarau nena hriat bel em em tur a ni. Dân taksa a awm loh hunah chuan Dân spirit mila kal mai tur a ni. Decision in siam thei lo chuan SEC thurawn lak tur a ni.SEC decision chu Dàn a ni mai. Decision siam ngaih huna siam lo hi wrong decision a ni, tih hriat tlat tur a ni, tiin trainees te chu midang zirtir thei khawpa an training te thiam bel turin a chah hlawm a ni.
Vawiin Training hi Pu Vanlalchhuanawma Chawngthu, Deputy Secretary, SEC, Mizoram chuan kaihhruaiin, Pi Laldinfeli, State Level master Trainer in training a pe a, Pu VL Remliana, Secretary, SEC,Mizoram chuan training hmawrbawkna hun a hmang.
