AH & Vety Minister Pu C Lalsawivunga chuan vawiin khan ranvulhtute tan Animal Insurance a tlangzarh.
Planning & Programme Implementation Dept Committee Room-a hun hmanah hian Minister chuan, Insurance Company tam zawkin animal insurance an tuipui loh thu leh, ASF avanga Mizoramah insurance company kohluh an har thu sawiin, Chief Minister Pu Lalduhoma'n Sorkar laipuiah thlen in, Insurance Company hrang hrang Head Office ah lehkha a thawn avanga tun dinhmun thleng ta an nih thu a sawi bawk.
Minister chuan Mizoram chu vawksa ah a intodelh dawna a lan mek laiin kum 2021 atanga ASF leng chuan nasa takin vawkvulhtute a nuai thu leh, kha hrilen atang khan ngai an awh leh tawh loh thu te, ASF avanga vawkvulhtute sum hloh hi vaibelchhe zakua sawmruk a tlin tawh thu a sawi.
Minister chuan sawi zawmin, sorkarin animal insurance ah theihtawp a chhuah thu sawi zuiin, Animal Insurance-a State Matching Share 30% pawh 10% a tihhniamsak turin Union Minister ah a ngen thu leh Mizoram ngenna angin 10% ah tihhniamsak a nih thu a sawi a. Vawiina insurance tlangzarh tak atan hian Central atangin cheng nuai 66.49 hmuh a nih thu leh, hei hi first installment chauh niin, first instalment ah hian ran 4545 insured tum anih thu a sawi a. Sorkar chu ranvulhtute hmangaihtu anih thu leh ASF avanga tuar te tawrhpui nan ASF chu state specific disaster ah puan anih tawh thu te, ASF tuarte zangnadawmna compensation pek thin an nih thu te a sawi bawk.
He Animal Insurance hian ranvulh hrang hrang (vawk, bawng, sial, kel, berawm) a huap dawn a. Implementing agency atan National Insurance Company Ltd thlan an ni. Premium zaa sawmpanga (15%) hi ranvulhtu ten an tum ve tur a ni a, Handholding hnuaia progress partners te erawh chu handholding atanga tumsak vek an ni dawn thung. Vawk vulh insurance atan cheng 2000 chawi tur kha cheng 292 chauh kuthnathawktu ten an tum a ngai dawn a ni.
Animal Insurance hnuaiah hian National Insurance Co. Ltd. atangin insurance dil dan tur tlangpui leh insurance hmuh theih dan te ngaihthlak a ni a. Insurance claim hi state dang a refer ngai lovin Aizawl ah chinfel theih a nih tur thu an sawi a ni.