TURNIPUI Dt.06.02.2026 : Mizoram Pradesh Congress Committee (MPCC) chuan vawiin chhun khan Mizoram Chief Minister Pu Lalduhoma hnenah CBI General Consent pe tur leh IAF hnena Lengpui ram hralhna man cheng 117.9 crore zet dawngtu Henry Lalremsanga Hlawnmual pawisa dawn mang tang eitu list puang zar tura ngenna lehkha an thehlut.
MPCC ten Chief Minister hnena lehkha an thehluhah chuan, "1st July, 2024-a i kaihhruai sorkarin CBI General Consent pekna a tihtawp tak avangin Mizoram sorkar phalna dil chawp zel ngailo a CBI ten eng case pawh an chhui theih nana General Consent pe leh turin MPCC chuan i hnenah 11th July, 2024 khan kan lo thlen tawh a. Mahse vawiin thlengin in intiamna anga CBI hnena General Consent pek a la ni lo hi pawi kan tiin thalo kan ti hle a. CBI in zalen taka eng case pawh an chhui theih nana General Consent pek hi Zoram mipuite hnena in intiamna a nih ang ngeiin February 2026 ral hma ngei a CBI General Consent pe leh turin MPCC chuan ZPM kaihhruai Mizoram sorkar kan phut a ni."
"Tin, MNF sorkar lai khan Indian Air force (IAF) in an lei tak Lengpui ram kha 248 crore zeta hralh tumna chu chak taka kalpui a ni a, an hralh fel hman tak loh avangin tun sorkarah 188 crore in hralh a lo ni ta a. A ram neitu Pu Rohmingliana’n 70 crore ram hralhna man a tel laiin, ram pawh nei miahlo Pu Henry Lalremsanga Hlawnmual in 117.9 crore zet Lengpui ram hralhna man a tel thung a ni. Ram neitu ni lo Pu Henry Lalremsanga Hlawnmual in ram hralhna atanga a dawn 117.9 crore chu sorkara thil tithei tak takte hnena sem tur thahnem tak a awm thu lo darh ta hi chhui chiang a, pawisa a sem chhuahna ni ngei a lang Mantang eitute list dik tak Zoram mipuite hnena puanzar a nih ngei theih nana hma la turin MPCC chuan i kaihhruai Mizoram sorkar kan ngen a ni," an ti.
MPCC Vigilance Chairman Pu R. Vanlalvena, Ex MLA chuan lehkhaah hian hming a ziak a, Chief Minister aiawhtu Pu Lalrinawma Khiangte, PS to Chief Minister chuan CM office ah a lo dawng a ni.
