TURNIPUI Dt. 22.01.2026 :  Nimin Dt.21.01.2026 chawhma dar 10:30 AM khan Vakrangee Kendra Company hnuaia mimal enkawl tur ATM Booth 13-na chu Champhai Vengthlang Awmpui phei Bazar-a Pu Haulianhranga building ah YMA Sub Hqrs President Pu Lalrinmuana'n a hawng a, Champhai Vengthlang Presbyterian Kohhran Tual Upa Rohlira Colney chuan ATM tluang taka a kal theih nan Pathian hnenah a hlan a ni.

Hawnna thu tawi sawiin, Pu Lalrinmuana chuan, "Vawiinah Champhaiin bung thar kan kai hi lawmawm ka ti a, khawvel hmasawnnain a ken tel ATM hi Champhai hian kan mamawh ang tawk kan nei lo va. Mi nawlpuiin kan hman theih tur ATM a awm thar leh tur hi hmasawnna ropui tak a ni. Vakrangee Company-in khawtlang leh District mipuite min ngaihtuahna hi a hlu ka ti a,  mimal enkawl tur ATM Booth 13-na kan hawng thei hi lawmawm ka ti takzet a ni, a ti.

ATM Booth thar hi Andrew Lalmuanpuia, Franchisee chuan a enkawl dawn a, Bank ATM Booth dangte nen a kalphung engkim a in ang vek a, ATM debit card bakah GPay QR Scan hmang pawhin pawisa a lakchhuah theih dawn a,  mimalin taima taka an vil dawn avangin pawisa awm lo tih ang kha a awm ve lovang. 

Vakrangee Kendra hian Mizoram hmun engemaw zatah mimal enkawl ATM Booth hi a hawng tawh a, Champhai khawpui bikah chuan a 3-na a ni.