Champhai, dated 26th February 2026: Vawiin khan DC Conference Hall, Champhaiah Special Intensive Revision of Electoral Rolls, 2026 puala din District Level Standing Committee chu an Chairman leh Champhai Bawrhsap ni bawk Pu Mohammad Aaquib hovin an thukhawm.
Special Intensive Revision (SIR) hi electoral roll pumpui siamthat hna a ni a, tunah hian a phase thumna kalpui chhoh tum mek a ni. Champhai District-in Assembly Constituency a huam chin pathum - 23-Champhai North, 24-Champhai South leh 25-East Tuipui hnuaia elector (vote thlak thei) te chunchang a thara lak that leh vek a ni ang a, Booth Level Officer (BLO) te'n in hrang hrangah a form an thehdarh dawn a ni. Form thehluh hrang hrang atang hian draft roll siam a ni ang a, tih dik loh te sawichhuahna hun siam a ni leh ang. SIR thlen hma hian bial hrang hrangah elector awm zat chhui chian (mapping) tih a ni ang a, officer leh mawhphurhna hrang hrang nei te tan inzirtirna neih a ni ang. He SIR atan hian BLO te kaihhruai tur Booth Level Committee din chu rawtin committee chuan a pawm a, he committee hian SIR mumal zawk leh rang zawka a kal theih nan kal dan tur an rel thin ang. Chairman leh Election Officer Pu Ngulzathuama te chuan zawhna hrang hrang an chhang bawk a ni.
Chairman Pu Mohammad Aaquib chuan SIR hi thil pawimawh tak, India ram pumpuia tih tur a ni a, tih sual leh tih that tawk lo te a awm loh nan theihtawp chhuah turin kalkhawmte a fuih a, Census nena tih rual a nih dawn avangin chiang taka mawhphurhna te hrechiang turin a chah bawk a ni.
He hunah hian Champhai SP Pu Lokeshwaran R, ERO leh AERO te, khawtlang hruaitute leh party mi te an tel a ni.
