Dated Aizawl, the 27th February, 2026: Vawiin khan Dr. Lalrozama, Chief Electoral Officer (CEO) chuan MINECO-a a pisa-ah April atanga Mizorama kalpui tan tur, Special Intensive Revision (SIR), 2025 chungchangah political party aiawhte meeting a neihpui.
CEO Dr. Lalrozama chuan meeting hi kaihruaiin, SIR chu electoral roll siam that dan pakhat a ni a, political party aiawhte chu SIR chungchang an party-te theuh hnena chiang taka hriattir tura kohkhawm an ni tih a hrilh a. ‘Ram leh hnam tana thawhhona tur pawimawh a ni a, electoral roll thianghlim, tha leh dik siam a ngai a, vote thlak tur dik tak chiah an tel tur a ni’, a ti.
Pu James Miahlung, Deputy CEO-in SIR chungchang a sawifiah a. The Representation of the People Act (RP Act) Section 21 behchhana kalpui a nih thu leh kum 1951 leh 2004 inkarah SIR hi vawi 8 kalpui a lo ni tawh a, Mizoramah chuan kum 20 chuang kal ta, 2002-2004 inkar khan kalpui a lo ni tawh tih a sawi a. SIR thil tum te, electoral roll hman meka siamthat ngaite a tarlang a. SIR, 2025 chungchang sawiin, phase khatna chu Bihar-ah June ni 25, 2025 atang khan kalpui niin, September ni 30, 2025 khan final roll tihchhuah a ni a; phase hnihna chu October ni 28, 2025 atang khan state 12-ah kalpui tan a ni a; phase thumna kalpui chhoh tum mek a ni, a ti.
SIR kalpui dan tur leh official hrang hrangte mawhphurhna a sawi a. SIR atana Mizoram inbuatsaih mek dan tarlangin, electoral mapping (SIR hmasa zawka roll nena enkawp) chu 91.67% zawh a ni tawh tih a sawi a. SIR atana political party-te mawhphurhna hrilhin, duhthusam chuan polling station tinah Booth Level Agent (BLA) ruat ni thei se tih a sawi a. Mizoramah polling station 1301 a awm a, chu’nga party tin BLA neihzat hriattir an ni bawk.
Pi Ethel Rothangpuii, Joint CEO pawhin political party-te nena thawhho dan tur leh an laka beiseite sawiin, Mizoram chu kalphung felfai tak nei angin state dangte’n an en a, fai lamah leh lirthei tlan dan entawntlak avangin a lar a, tun hnaiah Mamit District Election Office-in Best Election District hnuaia Model Code of Conduct Implementation and Enforcement chawimawina an dawng bawk a, SIR kalpui danah pawh mi dangte entawntlak kan nih zel theih nan tanrual a pawimawh thu a sawi a ni.
Sawihona hun neih zawhah meeting hi tihtawp a ni.
