Aizawl the 26th February 2026: Vawiin khan Chief Minister Pu Lalduhoma, Finance Minister ni bawk chuan Assembly House-ah Mizoram budget 2026-27 a pharh a. Chu mi zawhah Assembly Annexe Conference Hall-ah chanchinbumite kawmin Budget a pharh tak sawifiahna hi a nei zui a ni.

16th Finance Commission in Horizontal Devolution 0.564% a Mizoram chan tur a rawn tihsan avangin kum 2026-27 chhung hian share of Central Taxes & Duties atangin Rs. 8608.08 crore a rawn ni a. 15th Finance Commission aia a sanna hi Rs. 976.80 crore a tling.

Budget Estimate 2026-27 chuan Gross State Domectic Product (GSDP) hi Rs. 43,817.09 Crore ni turin a chhutlawk a, Revenue Receipts hi Rs. 2475.60 Crore niin Capital Receipts hi Rs. 2475.60 Crore a ni ang. A vaia belh khawm (Grant total of receipt/ Consolidated Fund) chu Rs. 17469.91 Crore a ni. Gross Expenditure chu Rs. 17076. 92 Crore a ni ang.

Kum 2026-27 budget total receipt hian total expenditure hi Rs. 392.99 Crore in a khum dawn a. A khumna hi Public Account Liability tihhniamna atana hman tur a ni.

Fiscal parameter langsar zualte chu:

Revenue surplus hi Rs. 899.84 Crore awm tura ngaih a ni a, chu chu 2.05% of GSDP a ni. Gross Fiscal Deficit hi Rs. 1669.02 Crore awm tura chhut a ni a, chu chu 3. 81 % of GSDP a ni. Primary Deficit Rs. 739.37 Crore awm tura chhut a ni a, chu chu 1.68% of GSDP a ni. Liability neih tura chhutlawk (projected liabilities) hi a vaiin Rs. 19085.15 Crore ni tura ngaih a ni a. Debt - GSDP ratio hi 43.56% a ni.

Leiba a pun chhan lian tak chu SASCI hi a ni a. SASCI sum hmuh reng reng hi puk anga kaltir zel a ni a. Kum 50 hnua a pung awm lova rulh tur (interest free loan), hmasawnna hnathawhna tura leiba tha chi a nih avangin SASCI hi sorkarin a tam thei ang ber hmuh zel a tum a. Puk a nih avangin sorkar leiba/puk a ti lang sang thung. Tun sorkar kum kal mekah hian SASCI atang hian Rs. 1519 Crore hmu thei tura ngaih a ni.

15th Finance Commission RLB Grant kha kum 2021-22 First Instalment bak dawn zui lohvin a awm reng a. Hei hi sorkar chuan ngaimawhin theihtawp a chhuah a, 2021-22 Second Instalment a dawn tur zawng zawng leh a hnu lama a dawn tur, a la dawn si loh zawng zawngte (RLB Backlog) chu a hai chhuak vek a, Rs. 25,350 lakh a tling a. Tun sorkar kum kal meka a dawn tur, a la dawn kim loh hi Rs. 7400 lakh vel a la awm a. Hmuh kim hman ngei tum a ni.

Heng bakah hian Mizoram sorkar sum dinhmun leh Budget pharh tak chanchinte a sawi a. Chanchinbumiten zawhna an neihte a chhang bawk.

Press Conference hi Pu Malsawmsanga, MIS, Jt. Director, I&PR in a kaihruai a. Chief Minister hi Pu TBC Lalvenchhunga, Adviser to CM (Finance & Planning), Pu Vanlaldina Fanai, Commissioner, Finance leh Finance Department hotu pawimawhten an tawiawm a ni.

Kum 2026-27 Mizoram budget tlangpui leh Finance Minister Budget Speech hi Mizoram sorkar Finance Dapartment website-ah en theihin a awm