TURNIPUI Dt. 05.02.2026 : Tun thla ni 17 atanga tan tur Assembly budget session-ah chuan February ni 19 (Ningani) khian Finance changtu Chief Minister Pu Lalduhoma'n tangka kum thar (2026-2027) atana Mizoram sum ruahman (Annual Budget) a pharh dawn.
Vawiina Assembly inkhawm hun hman dan tur duangtu, Speaker Pu Lalbiakzama kaihhruai Business Advisory Committee (BAC) thukhawm chuan budget session hun hman dan tur tlangpui an duang a. BAC duan dan chuan Pu Lalduhoma'n a vawi 3-na atan Mizoram budget chu February ni 19 khian a pharh ang a, a kar leh February ni 23 leh 24-ah a tlangpui a budget sawiho a ni ang. Budget session ni March ni 12 thleng awh tura ruahman chhin a ni. Assembly inkhawm tan ni February ni 17 chawhma dar 10 leh a chanve-ah larsap Gen. Vijay Kumar Singh chuan kum khata inkhawm hmasa bera tihdan pangngai-in Assembly House chhungah thu a sawi ang a, sorkar hnathawh tawh leh hmachhawpte a sawi ang. Hemi hnu hian larsap thusawi chunga lawmthu sawina motion pulutin a tuk February ni 18-ah sawiho a ni ang.
Tun thlengin sorkar atangin dan dinglai siamthatna tur (amendment bill) 5 a lut tawh a. House chhunga chhan chi zawhna (starred question) 749 leh zawhna ziaka chhan chi 287 a lut tawh bawk a, a la luh belh mek zel bawk a ni. Tun tum Assembly pakuana thutkhawm vawi rukna-ah hian mitthi sun tur an awm rih lo niin Assembly Secretariat official-te chuan an sawi a ni.
