TURNIPUI Dt.31.01.2026 : Mizoram Pradesh Congress Committee (MPCC) chuan nimin lamah kawngzawh hlawhtling tak an neih avangin lawmthu an sawi.
Thuchhuah an siamah chuan, "Sualna leh hlemhletna laka Zoram chhanchhuahna leh kan Kristian‑pui tihduhdah tuar mekte thlavang hauhna kawngzawh kan buatsaih min thlawptu Mizoram mipuite chungah Mizoram Pradesh Congress Committee chuan thinlung takin lawmthu kan sawi a. Mahni pawimawh leh tuldangte kalsana kawngzawh tura rawn pen chhuak zawng zawngte, kan thu leh hla lo ngaihventu leh kan programme a hlawhtlin theihna tura tha leh zung sengtute bakah, min lo tawngtaisaktu zawng zawngte chungah MPCC chuan lawmthu kan sawi tak meuh meuh a ni," an ti a.
"Hetih lai hian, kawngzawh kan huaihawt avanga Aizawl khawpui chhung nitin nunphung kan tihkhaihlak leh kan tih buai zawng zawngte chungah thupa kan chawi a, lirthei chetvel kawnga harsatna kan siam zawng zawngte chungah pawh ngaihdam kan dil takzet a ni, an ti bawk
MPCC chuan, kawngzawhnaa rawn tel remchang lo mahni awm hmun atanga min lo thlawptute chungah kan lawm hle a. Kawng kan zawh chhan ni 100 inhlawhna nuaibo chungchangte, sakhaw zalenna chungchang leh Lengpui Airport humhim a nih zel theih nana kan hmalaknate min lo thlawp zui zel tur leh min lo tawngtaisak thin turin MPCC chuan Mizoram mipuite kan ngen a ni, tiin an thuchhuahah an tarlang a ni.
