Aizawl, 23rd February, 2026: Power & Electricity Department chuan a hnuai ami ang hian Smart Billing System hnuaia Electric Bill chungchangah mipui hnena hriattirna a chhuah:
Hun rei tak Mihring (Meter reader) hmanga electric bill siam thin a nih avangin Thla 1 (khat) liamta bill consumer in kan dawng thin a, nimahsela, Aizawl Khawpuia Consumer thenkhat, Smart Billing System a lut thar a piang te chu Up-to-date a bill siam a lo tul ta a, hei vang hian thla 1 kar awl siamrem a ngaih avangin thla 1 aia rei bill (billing period Ni 30 aia rei) vawi khatah siam a lo ngai ta a, Electric Bill amount a lo sang ta thin a ni. Nimahsela, he bill sang bik hi Smart Billing system a lut thar apiangte chu an luh thla (vawi 1) chiah a ni dawn a ni.
Tin, Smart Meter billing system ah chuan remote hmanga reading lak a nih tawh avangin meter reader-in reading lak sual palh (Human error) a awm tawh lova, Consumer te'n electric kan hman man (Bill) dik thei ang bera siam a lo ni ta a ni. Meter chhiat vang emaw human error hrang hrang emaw vanga hun rei tak Electric Bill diklo chawi tawh te pawhin electric hman man dik tak kan chawi a ngai tawh dawn a, Electric bill (Rate) erawh Sawrkarin a ti danglam lo a ni tih kan in hriattir a ni. Billing period rei vanga vawi khata bill pek tlak harsa te tan Bill counter ah kalin installment a pek theih a ni ang.
Smart Billing System ah pawh hian tih sual palh (set sual palh) awm thei tho a ni a, Consumer te'n kan bill dawn ah diklo emaw sang lutuk ni a hria kan awm anih chuan mahni bialtu SDO Office ah complain ni se, electric bill complain turin bill pek hmasak phawt a ngai kher lova, complain chu min enfiah sakin tih dik loh palh a awm chuan chinfel phawt tur a ni a, chinfel hnuah chauh Bill chu pek zawk tur a ni. Hetianga electric bill complain kan siam a, kan bill chu a dik lo a nih pawha pek hmasak phawt a tul nia sawi an awm chuan SDO hnenah complain theh luh vat tur a ni a, a tul anga action lak tur a ni ang. Nimahsela, Bill dik tak a nih erawh chuan kan electric hman man dik tak chu chawi hreh lo turin consumer te kan in ngen a, kan electric hman man dik tak kan chawi theih nan Department chuan theih tawp a chhuah zel dawn a ni.
