TURNIPUI Dt. 05.02.2026 : Mizoram Pradesh Congress Committee chuan Lengpui leh Sihphir-a Indian Air Force te hnena ram lei leh hralh danah CBI te hnenah chhui turin FIR vawiin khan an thehlut a. Ram lei chungchang chu CBI te chhuitir ngei phutin, Mizoram sawrkar chu February thla ral hma ngeia CBI hnenah General Consent pe turin an ngen bawk.
February ni 4, 2026-a Council of Ministers meeting-in Indian Air Force ten Lengpui leh Sihphir ram an lak chungchangah, mipui ten thudik an hriat theih nan CBI kohluh ni se an ti chu MPCC chuan vanduaithlak hle a an hriat thu an sawi a. Sawrkarin Anti-Corruption Branch-ah Police chhuanawm tak tak a nei reng chungin anni ringzo lova CBI kohluh a ngai hian Home Minister-in a enkawl Home Department chungah rinna an nghat zo lo em ni? Mizoram Sawrkar hian a duh anih chuan ACB kaltlangin heng ram lei leh hralhna a sulsutu bera ngaih Henry Lalremsanga Hlawnmual mantang eitute chu a chhuichhuak thei a ni, an ti a. Hetiang thil chhuichian ngai tihnuhnawh leh tur siin engvangin nge heng ram te hi hmanhmawh taka IAF-in an acquire theih tura hma la nge an nih tih hi kan zawhna a ni, an ti.
