TURNIPUI Dt. 23.01.2026 : Ni 19.1.2026 (Thawhṭanni) Zan Dar 10:00 PM khan Myanmar aṭanga raltlan Aizawl ITI veng chhunga khawsa mi pathum ten Pu Lalthlamuana, Vanapa Section a awm chu YMA hmingin pawisa an dil a. A pek loh chuan kutthlak hiala vauin Pu Lalthlamuana hi pawisa pe lo thei lo dinhmunah an siam a. Hemi chungchang hi ITI Branch YMA chuan an ngai thutak hle a, thuchhuah siamin heng mi 3 te hi ITI veng atanga inthiarfihlim turin an hriattir nghal a ni.
__________________________________________________________
ITI Veng Branch YMA THUCHHUAH
Ni 19.1.2026 (Thawhṭanni) Zan Dar 10:00 PM khan, Myanmar aṭanga raltlana kan Vengchhunga rawn awm, mi pathum (3) ten, Pu Lalthlamuana, Vanapa Section a awm chu YMA hmingin pawisa an dil a. A pek loh chuan kutthlak hiala vauin, Pu Lalthlamuana hi pawisa pe lo thei lo dinhmunah an siam a ni. He thil thleng hi Branch YMA chuan a ngai thutakin, pawi a ti takzet a. Kan khawtlanga kan la tawn ngai loh leh kanla hriat ngai loh, YMA hming chhala mi vau chunga pawisa khawn a ni hi ITI Veng Branch YMA chuan pawi a tiin hriatthiam har a ti takzet a ni.
Hetianga lo ti tute hi ITI Veng Branch YMA chuan rang taka zawng nghalin, Ni 20.1.2026 zan khan heng mi pathum te hi Branch YMA Kumpuan Room ah thu zawhfiah tura koh nghal an ni a. Heng mi pathum te hian Branch YMA hruaitute hnenah an thilsual tih hi inpuangin, an ti ngei ani tih an pawm bawk a ni. Chung mi pathum te chu -
1. Duhlianthanga, Kum 18, Khampat (Myanmar)
A Pa - Vanlala, Vanapa Section
2. Hunlawmawma, Kum 17, Phulmawi (Myanmar)
A Pa - Sangkhuma, Vanapa Section
3. Lalrindika, Kum 21, Kawlchaw West
A Pa - Zoliansanga, Vanapa Section.
Ni 21.1.2026 (Nilaini) Zan Dar 8:15 khan Branch YMA chuan, heng mi pathum te hi YMA Hall ah ko lehin, ITI Veng Branch YMA huamchhunga raltlan awm zawng zawngte a ko khawm tel bawk a. Heng mi pathum te chungchang hi ITI Veng Branch YMA Executive Committee chuan kan Vengchhunga raltlan a rawn awmte awm laiin a rel nghal a ni.
ITI Veng Branch YMA chuan, raltlan chungchanga Branch YMA in, kum 2 kalta aṭanga thu dah sa a lo neih tawh ang leh, hetiang thil duhawmlo hi a thlen nawn tawh loh nan heng a chunga kan ziah lan mi pathum (3) te hi ITI Vengchhunga an awm rem a ti tawh lo a. Anmahni tan pawha a ṭhat zawk beiseiin, zanin aṭang hian ITI Veng leilung rawn rap tawh lo tura hriattir an ni. Tin, zanin la la hian thuneitute hnenah hlan nghal an ni bawk a ni.
Tunhnuah hetiang thil duhawm lo hi ITI Veng Branch YMA huamchhungah thleng nawn tawh lo se kan duh takzet a. A bik takin, Kan khawtlanga raltlan a rawn awmte, harsatna lian zawk a thlen loh nan, Khawtlang leh Kohhran kalphung leh inkaihhruaina awm angte ṭha taka zawm turin kan ngen nawn leh a ni.
Sd/-
HL.Hmangaihzuala
Secretary
ITI Veng Branch YMA
