TURNIPUI Dt. 11.02.2026 : Pu Lalmuanpuia Punte, MLA & Adviser to CM chuan, Kan kohhrante hian zu chungchanga kan ngaih dan hi her rem deuh ila chu ruihhlo hi a hluar lo deuhin a rinawm, a ti.
He thu hi Pu Lalmuanpuia Punte chuan ni hnih awh Dt. 10th & 11th February, 2026-a Young Mizo Association Tripura Group inkhawmpui, Behliangchhip khuaa neih a hmanpuinaah a sawi a. Mizovin YMA kan nei hi a hlu hle a, YMA tel lovin a bik takin chhiatniah phei chuan kan kal thei lo a ni ber; chutiang khawpa pawl pawimawh inkhawmpuia thu sawi theia ka awm hi ka lawm hle a ni. Kan chhehvel Manipur leh Burma ramah te opium chingin ruihhlo hian min chiahpiah hle a, YMA-in kum puanah 'Ruihhlo Do' a hmang hi a thain a pawimawh hle a ni, a ti.
Pu Muanpuia chuan Zampui tlang dung Mizote hnam inpumkhatna atana an pawimawhzia sawiin, Zofate hi hmun hrang hrangah kan inchen pawlh a, kan tawng hman tlanglawn ber 'Mizo tawng' kan tih mai hi ‘Duhlian tawng’ emaw, ‘Lusei tawng’ ti emawa sawi mai hi thil tha tak a ni. Mizo nisi tuna kan tawng hman tlanglawn ber ‘Duhlian tawng’ hmang ve loten Mizo tawng pai anga an inngaih tlat chuan inunauna a chhe thin. Zo hnam zawng zawng hi unau vek kan ni a, Mizo emaw, Zomi emaw, a hma leh hnung lama inbel hian kan unauna a tidanglam tur a ni lo. Zampui tlangdung Mizote hian Mizo hnam tan in chheh vela mi chengte zingah hna thawh tur tam tak in nei. Mizo hi hnam tlem kan ni a, piang pung tura tan kan lak tlan a ngai. Mizo mipa ruihhlo-in min khawih nasat lutuk avangin YMA member mipate kan tan tlan a ngai. Kan hmeichhiaten pasal tur an hmu zo lo mai dawn. Mizo mipa nih hi a zahthlak mai dawn. Mizo mipate hi khaw nge kan awm tak? I tang tlang ang u," tiin YMA khawmpui palaite a chah a ni.
Inkhawmpui hi Pu Lalnunfima, President, YMA, Tripura Group chuan a kaihruai a, Khual Sawm Bik Pi R. Lalrodingi, OSD to CM, Director, Tourism Department pawhin thuchah tawi a sawi a ni.
