TURNIPUI Dt. 23.01.2026 : State Transport Authority (STA) Mizoram chuan nikum November ni 10, 2025 khan Kolasib District chhunga Kawnpui Town area huamchhungah Two Wheeler Taxi tlan phalna a pe a, tunlai hian permit dilna an hawng mek niin Turnipui palai chuan thu a dawng.
Kawnpui Town chhunga Village Council hrang hrang - Kawnpui VC-I, II,III, IV, Venglai leh Bualpui North VC te chuan ‘Joint Village Council Kawnpui Town’ tiin, Dt. 21.10.2025 khan State Transport Authority hnenah dilna lehkha an thehlut a. Kawnpui Town huamchhungah In 2698 awmin, mihring 15000 vel an awm mek a. SDO (Civil) thuthmun anih bakah Sorkar Deptt office (SDO thuthmun) 3, Police Station 1 leh RO office 1, State Bank of Inida leh Mizoram Rural Bank Branch awmin; College, Higher Secondary School thlenga a awm tawh thu an sawi a. 1st IR Battalion Hqrs. Mualvum thuthmun niin, Rel station 2 a awm mek bawk a ni, an ti a. “Khua lo lian chho tawhin mihring pawh kan lo pung ta hle mai a, Taxi/Auto Service mai bakah Two Wheeler Taxi Service ve theihna khawpui kan ni ve tawhin kan hria a. Chuvangin Two Wheeler Taxi tlan theihna route-ah Kawnpui Town hi min puansak ve turin kan rawn dil a, min tihhlawhtlinsak chuan kan lawm hle ang”, tiin VCP theuhin hming an ziak a ni.
Joint VC Kawnpui Town lehkha thehluh chu STA chuan an ngaihtuah hnuah, November ni 10, 2025 khan STA Secretary, Transport Director ni bawk Er. R. Lalrammawia chuan chhangin, “Kawnpui Town hi Two Wheeler Taxi tlan theihna turin State Transport Authority-in a phalsak tawh e,” tih a hrilh ta a ni.
Kawnpui Town Area hian Kawnpui khawchhung pumpui leh Bualpui khawpum a huam a ni.
Two Wheeler Taxi hi September, 2016 ah permit pek tan a ni a, August ni 26, 2017 khan khatih laia Transport Minister Pu John Rotluangliana chuan Transport Directorate tual atangin a vailiam a. Tunah hian Mizoram chhung khaw hrang hrangah thahnem tak awm tawhin, mipuiten tangkai takin an hmang mek a ni.
