TURNIPUI Dt. 20.01.2026 : Kumin February ni 26 atanga March 1 chhunga Saitual-a neih tur, KTP General Conference 61-na puala Siruk Consultancy siam mobile application chu Inrinni kalta January ni 17, 2026 khan Organising Committee Chairman Rev. Thangchhuaka’n Saitual Kohhran Centenary Hall-ah mipuite hman theih turin a tlangzarh.
Upa Lalnunpuia, Chairman, Information, Media & Publicity Sub-Committee, Saitual chuan mobile apps tlangzarhna hun hi a kaihruai a, Tual Upa Michael Lalrinawma, Sub-Committee Secretary chuan Mobile Apps buatsaih dan report pein, an mamawhnate hriaa a thlawn liau liau va Siruk Consultancy ten an siamsak chu lawmthu a sawi a. Tv. Sunday Lalbiaknia, CEO, Siruk Consultancy chuan Apps hman dan tur leh nihphung sawifiahin, Inkhawmpui Lian thlen tiawlsamtu tur mobile application chu an buatsaih vawi khatna a ni a; a tuldan ang zela tihchangtlun kan tum a ni, a ti.
KTP General Conference mobile application hi playstore/apps store atanga download mai theih tura duan a ni a. Application chhungah hian Conference thuthar, programme kimchang, mikhual thlenna counter kimchang, lirthei chet dan tur traffic inkaihhruaina, thil bo leh char report-na, lehkha pawimawh inpek leh lamna turte bakah, committee peng hrang hrang thu pawimawhte leh Conference thlengtu Saitual khua leh Kohhran chanchinte tarlan a ni.
Siruk Consultancy hian Aizawl Chaltlang Dawrkawn-ah pisa neiin, Kohhran Inkhawmpui hrang hrang – Bial/Presbytery/District-ah mikhual thlen tiawlsamtu mobile application hi a thlawn vekin an lo siamsak tawh a, Kohhran mal website bakah Kohhran pumpui phonebook leh Sorkar mamawh application hrang hrangte an lo buatsaih tawh thin a ni.
KTP Gen. Conference App download link :
Android link: https://play.google.com/store/apps/details?id=com.siruk.ktpgeneralconferencemobile&pcampaignid=web_share
iOS link:
https://apps.apple.com/in/app/k%E1%B9%ADp-general-conference/id6756177008
