Mi rinawm tak pakhat hnen atanga thu dawn danin, Lai Autonomous District Council (LADC) hnuaia hnathawkte hian pisa kai kim se thutna an nei lovang an ti hial a, Council sum ei hektu ber niin council thenkhatah chuan budget pumpui za zela 90 chuang zet hlawh atana sen nih thu an sawi a ni.
LADC a sum leh pai dinhmun vawnga viltu 'Finance Department' in a zirchianna leh a rawtna angin LADC ah sum dehchhuah (Revenue inflow) leh senral inbuk tawklo avangin kawng hrang hrangin inremchen a tul thu tarlan a ni a. Hemi vang hian nikum September ni 1 atanga December ni 11 inkara Muster Roll a hna lak zawng zawngte chu, nimin February ni 1 atang khan chawlhtir vek an nih tur thu LADC Executive Secretary thupek chuan a tarlang.
Tun tum LADC inkhawmah khan sorkarna chelh hlim leh eptu lam hruaituten inrenchem pawimawhzia leh council inrelbawlna atana sum hmuh belh pawimawhzia uar takin an sawi chhuak hlawm a. Tun dinhmunah hian council hnuai a hnathawk hi an tam hle tihte sawi chhuakin hnathawkte hlawh atan sum a kal tam avangin hmasawnna hnathawhna tur sum a awm mang lo an ti a. Sorkar din thar chuan huai taka thutlukna a siam ngam a tul an tih thu an sawi bawk a ni.
Autonomous district council 3-ah te hian council hnuai a thawk leh council budget atanga hlawh la hi an tam hle ni a sawi a ni a. Rorellai party-in vote zawnna leh insawhnghehna atan an hmang thin ni a puh an ni bawk.
