Lawngtlai, 18th February 2026: Vawiin khan Lawngtlai District Level Committee on Fire Prevention - bultumin 'Fire Awareness Campaign' Bungtlang 'S' - I Community Hall- ah neih a ni a. Pu Donny Lalruatsanga, Lawngtlai Bawrhsap leh Chairman, Lawngtlai District Level Committee on Fire Prevention nibawk chuan khuallian niin a hmanpui a, Pu Gilbert Lalhlimpuia, BDO chuan hun a kaihruai.
Pu Donny Lalruatsanga chuan kalkhawmte hnena lawmthu sawina a nei a. Mizoram chhunga district zingah Lawngtlai District bik chu kum hmasa lamah kangmei tichhuak hnem ber lo nitawh mah se, kuminah erawh kangmei vênnaa titha ber nih tumin hmalak mêk a ni, a ti. Leipui, huan leh Lo hal hun tur hunbik siam vek a ni tawh a, thupek zawm lo te na taka hrem a tul tiin, VC - ten a zawnchhuah hna tha taka lo thawk turin a ngen a. Kangmei venna kawnga infuihtharna neih fo a tul hle tih tarlangin, hma lam hunah pawh a tam thei ang bera 'Awareness Campaign' neih a nih tur thu a sawi a ni.
Khuallian chuan kangmeiin nghawng a nei thui hle a, a venna kawngah mawhphurtu vek kan ni a ti. A bik takin ramngaw a kang hian nungchate, tui hna leh boruak a tichhe nasa em em a, kangmei chhuak lo tura theihtawp chhuah a ngai tak meuh a ni, a ti. Ramngaw nasa taka a kang hian sik leh sa nasa takin a tidanglam a, lei tha a tichhia a, boruak leh tui tlan thlengin a tichhia a, mihring tan harsatna a thlen nasa hle tih a sawi a. Kangmei avanga chhiatna thleng thei hrang hrang chhutin kangmei chhuak lo tura theihtawp chhuah a hun tawk takzet a ni, a ti. Bawrhsap chuan kangmei tichhuak lo tur leh a venna kawnga theihtawp chhuahpui turin VC, NGO leh khawtlang mipuite a sawm nghal bawk.
Vawiin hun hmannaah hian Pu Albert Lalrinzuala, Sr. ACF, LADC chuan Power Point Presentation hmangin kangmei chhuak lo tura inzirtirna hun a hmang a, Pu K. Lalremkima, President, Lawngtlai District Village Council Association Western Block, chuan lawmthu sawina neiin hun a khar.
