MPCC Senior Vice President Pu Lalnunmawia Chuaungo chuan vawiin khan Congress Bhavan Political Session neihah thu a sawi a, "Tunhnaiah Lengpui Airport hrula ram inlei chungchangah thu a darh a, Mizoram mipui ten kan ngaihven tlangin kan vei tlang a; hetiang thil diklo kan vei hi a lawmawm hle in ka hria a. Kan enliam mai tur a ni lova, dan bawhchhiatna nasa tak awm hi a ti tute hrem loha an chhuah loh nan mipuiten tan kan lak a ngai a, party ang pawhin kan enliam mai mai tur a ni lo, a ti.
Pu Chuaungo-a chuan, ""Lengpui Airport bula ram lei chungchangah hian MNF ho khan thil tenawm tak tih tumin hma an la a, sum vaibelchhe tam tak ei tumin thil an kalpui a. Mahse official a an kalpui thui hmain an sawrkar kha a tlak tak avangin an tifel hman ta lova. ZPM an lo sawrkar a, February ni 21, 2025 khan kan CM Pu Lalduhoma hian compensation tam uchuak tak pek tumna a awm avangin Lengpui Airport bul ram inleina chu an titawp rih a, 'Abeyance' ah an dah tih a sawi anih kha. Mahse Abeyance ah an dah tak tak lo nge ni, Henry-a te an che a, May ni 25, 2025 khan ram inleina tur notification an ti chhuak leh ta si a ni.
"He ram in leinaah hian Land Aquisition Process mumal taka kalpui a ni lova, mipui a nghawng dan tur, social impact tur pawh zirchian a ni lova, hmanhmawh taka kalpui a ni. July ni 24 ah khan ram inleina an tifel vek hman a, ram lak dan tur kal hmang anga kalpui a ni lova, dan pawh an bawhchhe vek a ni.
"Hmanni khan Adviser to Chief Minister khan MNF sawrkar laia tih fel vek a ni tawh a, DC level ah tih fel a ni a, kan hriatpui lo tia a sawi hi CM leh sawrkar hotu lawk te hian an hriatpui a, dawt a ni. Dan bawhchhiatna tam tak a awm a, dan an palzut vek a ni, a ti bawk.
