Lunglei, 2026 Ramtuk thla ni 18: Nimin khan Lunglei District Cooperative Development Committee (DCDC) chu Lunglei District Additional Deputy Commissioner Pi Rochuangkimi Khenglawt kaihhruaiin Lunglei DC Conference Hall-ah an ṭhu khawm a. District chhunga cooperative society-te hamṭhatna leh hmasawnna tur hrang hrang an sawi ho.
Lunglei District Cooperative Officer (DCO) leh DCDC Convener Pu S. Lalremngheta chuan thu ngaihtuah tura chhawp chhuahte a sawi zau va. Tlabung Zodin MPACS Ltd chu petrol leh diesel phal chin chhek khawm phalna (License for Non-Bulk Storage of Petrol and Diesel) pek an nih thu tar lan niin, Tlabung Zodin MPACS Ltd hi Mizoram Bana Kaih (Handholding) Scheme hnuaia hma lakpui tura thlan an nih thu tar lan a ni a. Lunglei District chhunga registered cooperative society 216 chu National Cooperative Database (NCD) Portal-ah chhinchhiah fel an nih tawh thu leh portal lama harsatna avangin society din tharte chu dah luh theih an nih tawh rih loh thu tar lan a ni bawk.
Damdawi man tlawm (generic medicine) zawrhna, PM Janaushadi Kendra chu Mizorama M-PACS zingah Lunglei District-a Leitlangpui M-PACS chauhvin an la kalpui thu tar lan niin, M-PACS dangte tana kalpui theih dan tur sawi ho a ni a. Cooperation Department aṭangin DCO tinin National Livestock Mission (NLM) leh Rashtriya Krishi Vikas Yojana (RKVY) hnuaia hma lakpui tur cooperative society pakhat ve ve thlang ṭheuh tura tih a nih angin, NLM atan Zobawk South Poultry Cooperative Society Ltd leh RKVY atan Mausen Banana Growers Cooperative Society Ltd te thlan chhuah an nih thu tar lan a ni bawk.
